OPEK-in Beynəlxalq İnkişaf Fondu infrastrukturun inkişafı çərçivəsində Azərbaycana 110 milyon ABŞ dollarından çox vəsait ayırıb. Ayrılan vəsaitin böyük hissəsi Sumqayıtda həyata keçiriləcək layihəyə yönəldiləcək.
Sumqayit.tv-in Trend-ə istinadən verdiyi məlumata görə, qərar fondun İdarə Heyətinin 195-ci iclasında qəbul olunub. Ümumilikdə Afrika, Asiya, Latın Amerikası, Karib hövzəsi və Avropa ölkələrində layihələrin maliyyələşdirilməsi üçün 890 milyon ABŞ dolları həcmində paket təsdiqlənib.
Bu paket çərçivəsində Azərbaycanda dövlət sektoru üzrə əsas layihə Sumqayıt şəhərində gündəlik 100 min kubmetr gücündə çirkab sularının təmizlənməsi qurğusunun tikintisidir. Layihənin həyata keçirilməsi üçün 90,4 milyon ABŞ dolları məbləğində kredit ayrılması nəzərdə tutulur.
Gözlənilir ki, yeni qurğu ən azı 427 min nəfərin sanitariya şəraitinin yaxşılaşdırılmasına, Xəzər dənizinin çirklənməsinin azalmasına və təmizlənmiş suyun kənd təsərrüfatında təkrar istifadəsinə imkan yaradacaq.
Bundan əlavə, özəl sektor üzrə Azərbaycana 20 milyon ABŞ dolları ayrılacaq. Bu vəsait mikro, kiçik və orta sahibkarlığın maliyyə resurslarına çıxışını genişləndirmək məqsədi daşıyır.
Qeyd edək ki, OPEK-in Beynəlxalq İnkişaf Fondu inkişaf etməkdə olan ölkələrdə iqtisadi artımın və sosial layihələrin dəstəklənməsi istiqamətində fəaliyyət göstərir. Fond indiyədək 125-dən çox ölkədə layihələrə 32 milyard ABŞ dollarından artıq vəsait ayırıb.
26-03-2026, 18:26
142
