Bu ilin I rübündə satmaq öhdəliyi ilə kirayə mexanizmi çərçivəsində Sumqayıt şəhərində yerləşən 1 ünvanda 235 müqavilə rəsmiləşdirilib.

Sumqayit.tv-in məlumatına görə, İpoteka və Kredit Zəmanət Fondu tərəfindən təqdim olunan dövlətə məxsus mənzillər şəhərdə yerləşən yaşayış komplekslərində vətəndaşlara kirayəyə verilib.

Qeyd edək ki, bu mexanizm vasitəsilə indiyədək ümumilikdə 9305 ailənin mənzil şəraiti yaxşılaşdırılıb. Mənzil sahibi olan vətəndaşların 60 faizdən çoxunu gənclər və gənc ailələr təşkil edir ki, bu da proqramın sosial yönümlü xarakterini göstərir.

Ümumilikdə, Fond tərəfindən bu günə qədər satmaq öhdəliyi ilə kirayə mexanizmi çərçivəsində 17 ünvanda mənzillər təqdim olunub. Bu ünvanlardan 3-ü məhz Sumqayıt şəhərinin payına düşür ki, bu da şəhərdə mənzil təminatının gücləndirilməsi istiqamətində atılan addımların davam etdiyini göstərir.

Təklif olunan mənzillər geniş həyətyanı sahəyə malik olmaqla yanaşı, məktəb, uşaq bağçası və səhiyyə müəssisələri kimi əsas infrastruktur obyektlərinə yaxın ərazilərdə yerləşir. Mənzillər müasir tikinti materialları ilə yüksək səviyyədə təmir olunub, kombi sistemi, su, qaz və elektrik sayğacları ilə tam təchiz edilib. Eyni zamanda, bu mənzillərin mülkiyyət hüquqları da dövlət qeydiyyatına alınıb.

8-04-2026, 16:46 180