Azərbaycanda cari ilin ilk rübü üzrə yeni açılan iş yerlərinin rəsmi statistikası məlum olub. Bu çərçivədə sənaye mərkəzi olan Sumqayıt şəhərinin də göstəriciləri diqqət çəkir.

Sumqayıt TV rəsmi məlumatlara istinadən xəbər verir ki, ilin ilk 3 ayı ərzində ölkədə ümumilikdə 23 min 506 yeni iş yeri açılıb. Bu göstərici ötən ilin müvafiq dövrü ilə müqayisədə 0,5% (120 iş yeri) artım deməkdir.

Açıqlanan hesabatda ölkənin böyük şəhərləri arasında yer alan Sumqayıtda 671 yeni iş yerinin açıldığı qeydə alınıb. Bununla da Sumqayıt, paytaxt Bakının rayonları və qonşu Abşeron (761 iş yeri) istisna olmaqla, respublikanın digər bölgələrini qabaqlayaraq ön sıralarda qərarlaşıb. Şəhərimiz bu göstərici ilə Gəncə (513 iş yeri), Şirvan (172 iş yeri) və Mingəçevir (123 iş yeri) kimi şəhərləri geridə qoyub.

Statistikaya əsasən, ölkə üzrə yeni iş yerlərinin böyük hissəsi — 75,8%-i (17 min 818-i) Bakı şəhərinin payına düşüb. Paytaxtda ən çox iş yeri Nərimanov rayonunda (2927), ən az isə Qaradağ rayonunda (284) qeydə alınıb. Respublika üzrə ən mənfi göstərici isə Culfa, Sədərək və Şahbuz rayonlarında qeydə alınıb; belə ki, bu 3 rayonda 3 ay ərzində heç bir yeni iş yeri açılmayıb.

Sumqayıt TV

Bu gün, 09:07 7