Dördüncü Sənaye İnqilabı Şəbəkəsinin Azərbaycan Mərkəzinin açılışı olub
Bu gün Bakıda Dünya İqtisadi Forumunun Dördüncü Sənaye İnqilabı Şəbəkəsinin Azərbaycan Mərkəzi açılıb və “Dördüncü sənaye inqilabında trendlər” mövzusunda tədbir keçirilib. Azərbaycan Dövlət İqtisad Universitetində təşkil edilən tədbirdə İqtisadiyyat naziri Mikayıl Cabbarov, Dünya İqtisadi Forumunun prezidenti Borge Brende, bir sıra dövlət qurumlarının, elm və təhsil müəssisələrinin rəhbər şəxsləri, iqtisadiyyatın müxtəlif sahələrində fəaliyyət göstərən şirkət və startap mərkəzlərinin nümayəndələri iştirak edib. Əvvəlcə Dünya İqtisadi Forumunun prezidenti Borge Brende UNEC-in fəaliyyəti ilə tanış olub. Sonra İqtisadiyyat naziri Mikayıl Cabbarovun və Dünya İqtisadi Forumunun prezidenti Borge Brendenin iştirakı ilə Dünya İqtisadi Forumunun Dördüncü Sənaye İnqilabı Şəbəkəsinin Azərbaycan Mərkəzinin açılışı olub. “Dördüncü sənaye inqilabında trendlər” mövzusunda keçirilən tədbirdə Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Tamerlan Tağıyev və Dünya İqtisadi Forumunun İcraçı Komitəsinin üzvü, Avropa, Avrasiya və Yaxın Şərq regionu üzrə rəhbəri Mirek Duşek çıxış edib, davamlı və dayanıqlı inkişafın təmin olunmasında rəqəmsallaşmanın və müasir texnologiyaların rolunu qeyd edib, özəl sektorun bu sahənin inkişafına daha geniş cəlb edilməsinin vacibliyini vurğulayıblar. Bildirilib ki, Azərbaycanda rəqəmsal iqtisadiyyat ekosisteminin inkişafı üçün böyük potensial var. Tədbir çərçivəsində “Dördüncü sənaye inqilabına əsaslanan iqtisadiyyat” sessiyası keçirilib. Sessiyada sualları cavablandıran iqtisadiyyat naziri Mikayıl Cabbarov 4Sİ texnologiyalarının və rəqəmsallaşmanın dünya iqtisadiyyatının gələcək inkişafına təsirləri barədə fikirlərini bölüşüb. Nazir bildirib ki, bu prosesdə Azərbaycanın mövqeyinin gücləndirilməsi və aparıcı ölkələr sırasında yer alması qarşımızda duran məqsədlərdəndir. Bu istiqamətdə Dünya İqtisadi Forumu və onun Dördüncü Sənaye İnqilabı Şəbəkəsi ilə əməkdaşlıq, dünyada az sayda olan Dördüncü Sənaye İnqilabı mərkəzlərindən birinin Azərbaycanda fəaliyyətə başlaması mütərəqqi texnologiyaların sürətli tətbiqinə, vətəndaşlara və ictimai marağa xidmət göstərməsinin təmin edilməsinə, rəqəmsal iqtisadiyyatın inkişafına töhfə verəcək. Dünya İqtisadi Forumunun prezidenti Borge Brende MDB regionunda ilk dəfə Dördüncü Sənaye İnqilabı Mərkəzləri şəbəkəsinin Bakıda mərkəzinin açılmasının əhəmiyyətini, iqtisadiyyatın şaxələndirilməsi və investisiyaların cəlb edilməsi baxımından önəmini vurğulayıb. Qeyd olunub ki, Azərbaycanın rəqəmsallaşmanın genişləndirilməsi hədəfi üzrə qətiyyəti ölkəmizin regional bilik mərkəzinə çevriləcəyinə əminlik yaradır. UNEC-in rektoru, professor Ədalət Muradov 4Sİ və bu çərçivədə baş verən rəqəmsallaşmanın qlobal iqtisadiyyatı yeni çağırışlarla üz-üzə qoyduğunu diqqətə çatdırıb. Bildirilib ki, dünya iqtisadiyyatının rəqəmsal transformasiyası, yüksək texnologiyalara əsaslanan istehsal ekosisteminin formalaşdırılması prosesində yaranan şərtlər 4Sİ tələblərinə cavab verən, rəqabətqabiliyyətli insan kapitalının formalaşdırılmasını zəruri edir ki, bu istiqamətdə təhsil müəssisələri daha fəal olmalıdır. Tədbir çərçivəsində Dördüncü Sənaye İnqilabının Təhlili və Koordinasiya Mərkəzi ilə İcbari Tibbi Sığorta üzrə Dövlət Agentliyi, həmçinin “Microsoft Azərbaycan” MMC arasında əməkdaşlığa dair anlaşma memorandumları imzalanıb. Tədbirdə Dünya İqtisadi Forumunun prezidenti Borge Brendeyə UNEC-in fəxri doktoru diplomu təqdim olunub. “Dördüncü sənaye inqilabında trendlər” tədbiri öz işini sessiyalarla davam etdirir.
23-02-2022, 16:48
203
