Bugün şəhərimizin daha üç şəhidinin anım mərasimi keçirilib.
Sumqayit.tv xəbər verir ki, tədbir iştirakçıları öncə Nəbiyev Nicat, Əhmədov Abdulla və İsmayılov Elvinin Şəhidlər Xiyabanındakı məzarlarını ziyarət ediblər. Tədbirdə İcra hakimiyyəti nümayəndələri, şəhid ailələri, qohumlar, qazilər iştirak edib. Daha sonra iştirakçılar mərasim evi və şəhidlərimizin doğulub böyüdüyü evlər ziyarət olunub.

Elvin İsmayılov 28 mart 2002-ci ildə Sumqayıt şəhərində anadan olub. 2008-2019-cu illərdə Sumqayıt şəhər 24 nömrəli tam orta məktəbdə təhsil alıb. Təhsilini bitirdikdən sonra bir müddət müxtəlif sahələrdə çalışmış və sonra hərbi xidmətə yollanıb. Elvin İsmayılov 2 oktyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı həlak olmuş və Sumqayıt Şəhidlər Xiyabanında dəfn olunmuşdur. 

Abdulla Əhmədov 2002-ci il martın 12-də Sumqayıt şəhərində anadan olub. Abdulla Əhmədov sentyabrın 29-da Talış istiqamətində şəhid olub. Sumqayıt şəhərinin Şəhidlər Xiyabanında dəfn olunub.

Nicat Ramil oğlu Nəbiyev 16 dekabr 2000-ci ildə Sumqayıt şəhərində anadan olub. Orta təhsilini Sumqayıt şəhərindəki 39 nömrəli orta məktəbdə alıb. Təhsilini peşə məktəbində davam etdirən Nicat "Avtomobil istismarı" ixtisasını bitirib. 2019-cu ilin iyun ayında hərbi xidmətə yollanıb. Goranboydan Ağdama kimi xidmət yolu keçib. Sentyabrın 27-də hərbi əməliyyatlar başlayandan ön cəbhədə olub. Nicat Nəbiyev oktyabrın 1-i düşmən tərəfindən atılan artileriyya atəşi zamanı 20 nömrəli döyüş mövqeyində şəhidlik zirvəsinə ucalıb.
Allah rəhmət eləsin!