Sumqayıtda sahibsiz küçə itlərinin sayı çoxalıb
Sumqayit.tv-in ünvanına şikayət daxil olub. Şikayətçi, Sumqayıt şəhər sakini Aygün Ağayeva bildirir ki, “Əşya bazarı” adlanan ərazidə küçə itlərinin sayı çoxalıb. “Hətta, dekabr ayının 15-i saat 16:00 radələrində həmin bu küçə itlərindən biri məni tutdu. Onsuzda uzun illərdir Sumqayıt küçələrində it sürüləri meydan suladığindan qorxurduq. İndi bu hadisədən sonra daha da həyəcanlıyam.
"Üç uşaq anasıyam. Övladlarım baxçaya, məktəbə gedirlər. Çox qorxuram onlara nəsə olar. Özüm isə 11 nömrəli tam orta məktəbdə işləyirəm və sözügedən ərazidən gün ərzində 2-3 dəfə keçməli oluram.  Yoldaşım da 2-ci Qarabağ müharibəsi veteranıdır. Hal-hazırda quduza qarşı müalicə alıram. Bir ana kimi sizdən xahiş edirəm məsələni ictimailəşdirin ki, şəhərdəki it problemini həll etsinlər. Bizim müraciətlərimizə aidiyyatı qurumlar baxmır.”

Məsələ ilə bağlı Sumqayıt şəhər İcra Hakimiyyətinin mətbuat xidmətinin rəhbəri Eyvaz Qocayev ilə əlaqə saxladıq. İcra rəsmisinin sözlərinə görə, "Sumqayıt şəhərində sakinlərin təhlükəsizliyinin təmin edilməsi məqsədi ilə davamlı olaraq sahibsiz itlərin götürülməsi və ərazidən uzaqlaşdırılması işləri həyata keçirilir. Sumqayıt şəhər İcra Hakimiyyəti tərəfindən aidiyyəti qurumlara tədbirlərin daha da gücləndirilməsi üçün tapşırıq verilib" 

Jurnalist Şəbnəm MƏŞİYEVA