Sumqayit.tv-in əldə etdiyi məlumata görə, hadisə Sumqayıt şəhəri, Kotec qəsəbəsi ərazisində baş verib. 
Hadisəni törədən Qədirin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 
Cinayət işi üzrə təqsirləndirilən şəxs qismində ifadə verən Qədir ona elan olunmuş ittiham üzrə özünü təqsirli bilib. O bildirib ki, zərərçəkmiş Altayı təxminən 4 il əvvəl tanıyıb: “Həmin vaxt Altay Kotec qəsəbəsində kirayədə yaşayırdı. Həmin vaxtdan da onunla münasibətlərimiz yarandı. Hadisə günü, saat 21.30-da yaşadığım ünvana getdiyim zaman “Las Vegas” kafesinin yaxınlığında Altayı gördüm. Onunla söhbət etməyə başladım. Söhbət zamanı Altaya təxminən 6 ay əvvəl borc verdiyim 70 manatı tələb etdim. O da hazırda maddi imkanının olmadığını, imkanı olduğu zaman mənə olan 70 manat borcunu ödəyəcəyini dedi”. 
Təqsirləndirilən şəxs qeyd edib ki, lakin həmin vaxtdan Altayı görmədiyini, buna görə də pulun indi istədiyini bildirib: “Yenə də təkid edərək pulumu istədim. Buna görə də Altay əsəbiləşdi. Altay yüksək səslə imkanı olmadığını bildirərək ünvanıma nalayiq ifadə işlətdi. Bundan sonra onun üzərinə getdim. Həmin vaxt da sağ əlim ilə Altayın sol göz nahiyəsinə yumruqla bir dəfə zərbə vurdum. Altay da barəmdə polisə müraciət edəcəyini bildirdi. Mən də Altayı vurduğumdan peşman oldum. Ondan üzr istəmək istədim. Altay da yenidən məndən şikayət edəcəyini bildirdi və oradan getdi”.
Bu cinayət işinə Sumqayıt şəhər Məhkəməsində baxılıb. 
Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. 
Bu səbəbdən Qədirin barəsində olan cinayət təqibinə xitam verilib. O, cinayət məsuliyyətindən azad edilib.//demokrat.az