Sumqayıt şəhər İcra Hakimiyyətinin başçısı Zakir Fərəcov Qərbi Azərbaycan İcması (QAİ)  Sumqayıt Nümayəndəliyinin üzvləri ilə görüş keçirib. 
Sumqayit.tv-in verdiyi məlumata görə, Sumqayıt Dövlət Dram Teatrının konfrans zalında baş tutan görüşə QAİ Sumqayıt Nümayəndəliyinin İdarə Heyyətinin, Ağsaqqalar Şurasının, Qadınlar Surasının və Gənclər Birliyinin üzvləri ilə yanaşı , şəhərin ictimai-mədəni sahəsində fəal rolu olan Qərbi Azərbaycan kökənli ziyalılar da qatılıb.
Toplantını Nümayəndəliyin rəhbəri Ramiz İsmayılov açaraq, Sumqayıt Şəhər İcra Hakimiyyətinin başçısı Zakir Fərəcova və tədbir iştirakçılarına QAİ sədri, deputat Əziz Ələkbərlinin salamını çatdırıb. O şəhər rəhbərinin İcma üzvləri  ilə baş tutan  görüşünü Nümayəndəliyə göstərilən böyük diqqət və qayğı  kimi qiymətləndirib. Zakir Fərəcova öz adından və icma üzləri adından təşəkkürünü bildirib. 
İcma üzvlərini salamlayan Zakir Fərəcov bildirib ki, onun üçün də Qərbi Azərbaycan İcmasının üzvləri ilə görüşmək xoşdur.
"Qərbi Azərbaycan kökənli soydaşlarımızın dərdləri mənə çox yaxından tanışdır. Belə ki, 1988-ci ildən erməni aqressiyası nəticəsində azərbaycanlı ailələr indiki Ermənistan deyilən respublikadan didərgin salınarkən, on minlərlə insan məhz Sumqayıta pənah gətirdi. O zaman rəhbərlik elədiyim birliyi səfərbər edib üzərimizə düşən nə köməklik lazım idisə hamısını həyata keçirməyə çalışdıq. O cümlədən soydaşlarımızı yaşayış yerləri və işlə təmin etdik. Bu gün isə artıq zaman dəyişib. Azərbaycan, prezidenti  cənab İlham Əliyevin qətiyyətli siyasəti nəticəsində misilsiz uğurlara imza atırıq.  Növbəti strateji hədəflərdən biri də məhz, Qərbi Azərbaycandan deportasiya olunan soydaşlarımızın öz doğma ata-baba yurdlarına qayıtmasıdır.  Yəni, zamanın tələbinə uyğun olaraq bu gün Qərbi Azərbaycan mövzusu prioritet məsələyə çevrilib. Ona görə də bu məsələyə təkcə Qərbi Azərbaycan kökənlilər deyil, hamımız dəstək verməliyik."- deyə, Z.Fərəcov bildirib.
Eyni zamanda Zakir Fərəcov QAİ Sumqayıt Nümayəndəliyinə rahat və səmərəli  fəaliyyət göstərməsi üçün şəhərin mərkəzi hissəsindən birində 6 otaqdan ibarət ofis ayrılması və təmir olunub icma üzvlərinin sərəncamına verilməsinə dair göstəriş verdiyini toplantı iştirakçılarının diqqətinə çatdırdı. O bundan sonra da İcmanın Sumqayıt Nümayəndəliyinə istənilən köməkliyi göstərməyə hazır olduğunu və daima diqqət mərkəzində saxlayacağını vurğuladı.
Daha sonra İcmanın bir neçə üzvü çıxış edərək, Sumqayıt şəhər İcra Hakimiyyətinin başçısı Z.Fərəcova göstərdiyi isti münasibətə və verdiyi tövsiyələrə görə minnətdarlıqlarını bildirdilər. 
Qeyd edək ki, iki saatdan artıq davam edən görüş səmimi dialoq və işgüzar şəraitdə keçmişdir.