Sumqayıtın 34-cü məhəllə 48/2-in sakinləri illərdir ki, üzləşdikləri məişət tullantıları səbəbindən  antisanitariya vəziyyətindən əziyyət çəkirlər.
Bu barədə Sumqayit.tv-yə həmin ərazidə yaşayan sakinlər məlumat veriblər.
Sakinlərin sözlərinə görə, sözügedən məhəllənin insanları antisanitariya və üfunət qoxusundan xəstəliklə üz-üzə qalıblar. Hansı ki, bu ərazidə minlərlə insan yaşayır.
"Bura Sumqayıtın mərkəzi olduğundan yaşamaq üçün əlverişli olsa da, yaradılan süni əngəllər o cümlədən antisanitar vəziyyət  bizləri çıxılmaz vəziyyətə salıb. Kənardan baxanda bizim məhəllə məişət tullantıları poliqonunu xatırladır. Gaha bazardan çıxan meyvə-tərəvəzin zibilləri, gah da kəsilmiş heyvan başlarını gətirib həyətə atırlar. Bilmirik bura, yaşayış massividir, yoxsa zibil poliqonu. Ərazidən nə keçmək olur, nə də maşın saxlamaq. Bazarda çalışanlar maşınlarını gətirib ev 48/2-in qarşısında saxlayır. Pəncərələrin qabağında kafelər açılıb, bütün günü söyüş söyürlər. Bu isə insanların haqlı narazılığına səbəb olur. Bilmirik kimə müraciət edək.”- deyə şikayətçilər bildiriblər. 

Ümid edirik ki, işqlandırdığımız məsələ ilə bağlı aidiyyatı qurumlar, xüsusən də  Sumqayıt şəhər Təmizlik Departamenti MMC-in rəhbərliyi yaxın zamanlarda problemin həlli istiqamətində əməli addımlar atacaqlar. 

Mövzunu diqqətdə saxlayacağıq.