İranın müdafiə naziri general-mayor Əziz Nəsirzadə deyib ki, Avropa İsrailə nəzarət etməlidir, əks halda İranın cavabı ilə üzləşəcək və Yaxın Şərqdə böyük müharibə başlayacaq.

Hər zaman proksi qüvvələr vasitəsilə bu əməliyyatları davam etdirdiyi deyilirdi. İndi isə Tehran Qərbi açıq şəkildə müharibə ilə hədələyir. İran birbaşa müharibəyə qoşula bilərmi?
Globalinfo.az-a danışan politoloq Elçin Abdullayev deyib ki, İranın müdafiə nazirinin bu müraciəti əslində İranın açıq şəkildə müharibəyə girməyəcəyini göstərir:

Elçin Abdullayev
“Qərbin regionda yürütdüyü siyasət İsrailin iradəsindən kənarda baş vermir. İsrail Qərbin regionda siyasi xəttini cızmaq rolunu öz üzərinə götürüb. Dünənki prosesdən sonra ABŞ prezidenti Co Baydenin dərhal orduya İranın atdığı bütün mərmilərin vurulması üçün əmr verməsi ondan xəbər verir ki, İran həm də ABŞ-la müharibəyə girib”.
Politoloq gərginliyin açıq müharibəyə keçəcəyini düşünmür:
“Avropanın aparıcı dövlətləri də dünən İsrailə dəstəklərini ifadə etdilər. Hadisələrin bu həddə çatmasının da müəyyən səbəbləri var. HƏMAS və “Hizbullah” liderlərinin öldürülməsi İranın üzərinə məsuliyyət yüklədi. Tehranın cavabı İsrailə atılan mərmilərdən ibarətdir. İsrail də öz növbəsində buna cavab verəcək. Bu zərbələr də əsas strateji məkanlara vurulacaq”.