SUMQAYIT TV Real TV-ə istinadən bildirir ki, 70-dən çox yaşı olan Amaliya nənə Sumqayıt şəhəri, 3-cü mikrorayon 19b ünvanında yerləşən 12 mərtəbəli binanın 10-cu mərtəbəsində yaşayır. O hər gün azı iki dəfə evinə aparan 180 pilləni qalxıb enməli olur. Səbəbi yaşadığı binada iki liftin olmasına baxmayaraq, onların işləməməsidir.

Verilişimizə müraciət edən sakinlər deyir ki, sözügedən ünvanda yerləşən bu binada illər öncə həm yük lifti həm də sərnişin lifti yenisi ilə əvəz olunub. Amma yük lifti xarab olduqdan sonra sərnişin lifti yükləndiyindən o da, tez tez sıradan çıxır. Təbii ki, çoxmərtəbəli binalarda liftin olması insanların mənzil başına tez və rahat çatmasına xidmət edir. Amma sakinlər bu xidmət üzünə tez tez həsrət qalırlar. Bu azmış kimi pilləkanların darısqallığı da sakinlərə əiyyət verir.

Binalarında quraşdırılan iki liftin davamlı olaraq işləyəməsi xəyalı ilə yaşayan sakinlərin problemini Sumqayıt Şəhər İcra Hakimiyyətinə ünvanladıq.

Ümid edəki ki, tezliklə məsələ öz müsbət həllini taparaq bina sakinlərini, ələlxüsus də bu binada yaşayan şəhid ailəsini sevindirəcək.