Bu gün Yeni Azərbaycan Partiyası (YAP) Sumqayıt şəhər təşkilatı və Qərbi Azərbaycan İcması Sumqayıt nümayəndəliyinin birgə təşkilatçılığı ilə “Soy kökümüzdə Novruz - Qərbi Azərbaycan Ənənələri” adlı tədbir keçirilib.
Sumqayit.tv xəbər verir ki, tədbir YAP Sumqayıt şəhər təşkilatının konfrans zalında baş tutub.
Tədbiri giriş sözü ilə YAP Sumqayıt təşkilatının sədr müavini Cavid Məmiyev açıb. Azərbaycanın müstəqilliyi uğrunda canlarını fəda etmiş şəhidlərin xatirəsi bir dəqiqəlik sükutla yad edilib. C.Məmiyev Azərbaycan dövlətinin uğurlarından danışaraq, hər kəsi Qərbi Azərbaycana qayıdış prosesində fəal iştirak etməyə çağırıb. O, Novruzun əhəmiyyətini vurğulayaraq, bu ənənələrin gələcəkdə Qərbi Azərbaycanda da davam etdiriləcəyinə əminliyini vurğulayıb.

Qərbi Azərbaycan İcmasının Sumqayıt nümayəndəliyinin rəhbəri Ramiz İsmayılov çıxış edərək tədbir iştirakçılarını salamlayıb və onları Novruz bayramı münasibətilə təbrik edib. O, Novruzun türk xalqlarına məxsus qədim bayramlardan biri olduğunu vurğulayaraq, onun şumer dövründən günümüzə qədər gəlib çıxdığını və hazırda dünyanın 22 ölkəsində qeyd edildiyini bildirib. Novruzun əsas atributları haqqında danışan R. İsmayılov bu bayramın xalqımızın milli kimliyinin bir hissəsi olduğunu və adət-ənənələrimizin qorunub saxlanmasının vacibliyini qeyd edib.

Daha sonra Sumqayıt Şəhər İcra Hakimiyyətinin humanitar məsələlər üzrə şöbə müdiri Fərman Kazımov çıxış edərək, tədbir iştirakçılarını təbrik edib və Sumqayıt şəhər İcra hakimiyyətinin başçısı Zakir Fərəcovun salamlarını çatdırıb. O, Novruzun milli-mənəvi dəyərlərlə sıx bağlı olduğunu vurğulayaraq, bu bayramın artıq işğaldan azad olunmuş ərazilərdə də qeyd edilməsinin sevindirici hal olduğunu bildirib. F. Kazımov çıxışında Qarabağ məsələsinin uğurla həll edilməsindən sonra növbəti hədəfin Qərbi Azərbaycan olduğunu xüsusi vurğulayıb.

Tədbirdə QAİ Ziyalılar Şurasının üzvü, professor Aftandil Məmmədov da çıxış edərək, Novruz bayramına həsr olunmuş bayatılar səsləndirib və gələcəkdə bu bayatıların Qərbi Azərbaycan torpaqlarında səslənməsini arzulayıb.
Əslən Qərbi Azərbaycandan olan gənc tələbə Nəzrin Alıyeva qərbi azərbaycanlıların Novruz bayramını qeyd etmə ənənələri haqqında fikirlərini iştirakçılara çatdırıb.
Daha sonra QAİ Sumqayıt nümayəndəliyi İdarə Heyətinin və Sumqayıt Bələdiyyəsinin üzvü Akif Şahbazov Qərbi Azərbaycanın zəngin folklor irsinə malik olduğunu vurğulayaraq, burada Novruz bayramına aid müxtəlif sınama və inancların qorunub saxlanıldığını bildirib.
Tədbirdə çıxış edən QAİ Ağsaqqallar Şurasının üzvü Hüseyn Babayev isə Novruzun tarixi kökləri və mənəvi dəyəri barədə məlumat verib