Sumqayıtda Novruz bayramı xüsusi coşqu ilə qarşılanıb. Baharın gəlişini qeyd etmək üçün Sumqayıt Bulvarında möhtəşəm bayram tədbiri keçirilib. Tədbirdə şəhər rəhbərliyi, millət vəkilləri, hüquq-mühafizə orqanlarının nümayəndələri və minlərlə sakin iştirak edib.
Sumqayit.tv xəbər verir ki, şəhər İcra Hakimiyyətinin başçısı Zakir Fərəcov, bayram münasibətilə şəhər sakinlərini təbrik edərək, Novruz tonqalını yandırıb. O, Novruzun xalqımızın tarixindəki əhəmiyyətini vurğulayıb, bayramın ölkəmizə sülh və firavanlıq gətirməsini arzulayıb.
Bayram tədbirində "Dədə Qorqud" və "Bahar qızı" öz xeyir-dualarını verib, milli geyimli uşaqların rəqsləri, kosa və keçəlin zarafatları maraqla qarşılanıb. Meydanda qurulan milli üslublu guşələrdə xalqımızın zəngin mədəni irsi nümayiş etdirilib.
Sumqayıtda təşkil olunan bayram şənliyi şəhər sakinlərinə və qonaqlara əsl Novruz ab-havası bəxş edib.