Bakı şəhəri Yasamal rayonu, Alatava ərazisində aparılan qanunsuz söküntü işləri ilə bağlı Dövlət Şəhərsalma və Arxitektura Komitəsi tərəfindən araşdırma aparılıb.
Sumqayit.tv xəbər verir ki, martın 27-də Bakı Şəhər Memarlıq və Şəhərsalma Baş İdarəsinin əməkdaşları əraziyə baxış keçirərək, görülən işlərin müvafiq icazə olmadan aparıldığını müəyyən ediblər.

Komitədən verilən məlumata görə, aparılan söküntü işləri həm mövcud qanunvericiliyin tələblərinə zidd olub, həm də ərazidə yaşayan vətəndaşlarla razılıq əldə edilmədən həyata keçirilib. Buna görə də, Baş İdarə aidiyyəti qurumlarla birgə söküntü prosesini dərhal dayandırıb və müvafiq akt tərtib edib.

Həmçinin, vətəndaşların mülklərinə dəymiş ziyanın araşdırılması məqsədilə toplanmış materiallar hüquq-mühafizə orqanlarına təqdim ediləcək. Araşdırmanın nəticələri ilə bağlı ictimaiyyətə əlavə məlumat veriləcəyi gözlənilir.