Son günlər Sumqayıt şəhərində sahibsiz itlərin insanlara hücum etməsi ilə bağlı yayılan məlumatlar şəhər sakinləri arasında ciddi narahatlıq yaradıb. Məsələ ilə bağlı redaksiyamıza çoxsaylı şikayətlər daxil olub.

Mövzuya aydınlıq gətirmək məqsədilə Sumqayit.tv-yə Sumqayıt Şəhər İcra Hakimiyyətinin Mətbuat Xidmətinin rəhbəri Eyvaz Qocayevdən açıqlama verib.

  Eyvaz Qocayev

Onun sözlərinə görə, şəhərdə sakinlərin təhlükəsizliyinin təmin olunması məqsədilə mütəmadi olaraq tədbirlər görülür:

“Sumqayıt şəhərində sahibsiz itlərin toplanaraq uyğun sığınacaqlara yerləşdirilməsi, eyni zamanda peyvəndlənməsi işləri həyata keçirilir. Bu prosesin daha da intensivləşdirilməsi üçün müvafiq qurumlara tapşırıqlar verilib. Həmçinin, könüllülərin də bu işə cəlb olunması təmin olunub.”

Məsələnin psixoloji tərəflərinə toxunan Freyd Psixoloji və Nitq İnkişaf Mərkəzinin rəhbəri Arifə Məmmədova isə bildirdi ki, uşaqların heyvanlarla münasibəti düzgün formalaşdırılmalıdır:

 Arifə Məmmədova

“Küçə və ev iti anlayışı doğru deyil. Hər bir heyvan canlıdır və onlara münasibətimiz insanlığımızı göstərir. İnsanlar bu canlılara yaxşı davranmalıdırlar ki, onların da bizə qarşı münasibəti müsbət olsun. Əks halda, uşaqlarda qorxu və aqressiya kimi psixoloji problemlər yarana bilər.”

Arifə Məmmədova əlavə edib ki, valideynlər və müəllimlər bu sahədə maarifləndirici fəaliyyət aparmalıdırlar:

“Uşaqlara öyrətmək lazımdır ki, itlərə daş atmaq olmaz. Əksinə, onlara yemək verməklə, düzgün davranış sərgiləməklə həm qorxu hissini aşmaq olar, həm də heyvanlara qarşı mərhəmət hissi aşılanar. Freyd ailəsi olaraq, biz bu sahədə maarifləndirmə işləri aparmağa hər zaman hazırıq.”

Hazırda sahibsiz itlərin toplanması və təhlükəsizlik tədbirləri davam etdirilir. Şəhər sakinlərindən xahiş olunur ki, sahibsiz heyvanlarla qarşılaşdıqda sükunəti qorumaqla yanaşı, aidiyyəti qurumlara məlumat versinlər.

28-04-2025, 13:04 349