Qafan rayonunda anadan olmuş və 1992-ci ildə Ağdərə istiqamətində gedən döyüşlərdə qəhrəmancasına şəhid olmuş Səfərov Səfəralı Allahverdi oğlunun xatirəsi əbədiləşdirilib.

Sumqayit.tv-yə verilən məlumata görə, 1988-ci ildə ailəsi ilə birlikdə erməni deportasiyası nəticəsində Sumqayıta köçmüş Səfəralı Səfərov burada İsmət Qayıbov adına 1 saylı tam orta məktəbdə təhsil almışdı. O, 29 sentyabr 1992-ci ildə şəhidlik zirvəsinə ucalıb. 32 il sonra – 2024-cü ildə onun nəşi Ağdərə rayonunda tapılıb və Sumqayıt Şəhidlər Xiyabanında dəfn edilib.

Şəhidin bacısı Abdullayeva Gülçöhrə onun xatirəsini yaşatmaq məqsədilə “Telli Sənəm” adlı ədəbi-bədii publisistik jurnal dərc etdirib. Jurnalın təqdimat mərasimi Sumqayıt Şəhidlər Xiyabanında – şəhidin məzarı başında təşkil olunub.

Təqdimatda şəhidin ailə üzvləri, Qərbi Azərbaycan İcmasının Sumqayıt nümayəndəliyinin üzvləri, ziyalılar, şairlər, müəllimlər, şəhidin adını daşıyan 1 saylı məktəbin 5C sinifinin rəhbəri və şagirdləri, eləcə də yaxınları iştirak ediblər. Tədbirdə Səfəralı Səfərovun şərəfli ömür yoluna dair xatirələr bölüşülüb, şagirdlər və şairlər tərəfindən ona həsr olunan şeirlər səsləndirilib.

Qeyd edək ki, şəhidin adı oxuduğu məktəbdə – 5C sinfinə verilərək əbədiləşdirilib.

29-04-2025, 19:16 306