08 may 2025-ci il tarixində saat 17:00-da Sumqayıt Dövlət Dram Teatrında yeni tamaşanın premyerası keçiriləcək.

Tamaşa yazıçı-dramaturq Hidayətin “Burdan min atlı keçdi” əsərinin motivləri əsasında hazırlanıb və “İrəvanda nəyim qaldı...” adlanır.

Səhnə əsərində Azərbaycanın qədim yurdu olan İrəvanda zaman-zaman azərbaycanlılara qarşı aparılan təxribatlar, erməni ideoloqlarının ərazi iddiaları, həmçinin ümummilli lider Heydər Əliyevin Qərbi Azərbaycanda yaşayan soydaşlarımızın siyasi müdafiəsi öz əksini tapır.

Quruluşçu rejissor və musiqi tərtibatçısı Xalq artisti Firudun Məhərrəmov, quruluşçu rəssam Mustafa Mustafayevdir. Tamaşaya məsləhətçi qismində Qərbi Azərbaycan İcmasının Sumqayıt üzrə nümayəndəsi Ramiz İsmayılov və filologiya elmləri doktoru, professor Mahirə Nağıqızı cəlb olunub.

Tamaşada tarixi faktlar dialoqlar və monitor vasitəsilə kinoxronika olaraq təqdim edilir. Bu səhnə işi ümummilli lider Heydər Əliyevin anadan olmasının 102-ci ildönümünə layiqli töhfə kimi təqdim olunur.