Dünya karatesinin canlı əfsanəsi, 5 qat dünya və 11 qat Avropa çempionu Rəfail Ağayev bir gündə keçirdiyi iki ağır əməliyyatdan sonra həkimlərinə təşəkkür edib.
Sumqayit.tv-in məlumatına görə, Rəfail Ağayev özü sosial şəbəkə paylaşımında qeyd edib ki, burun çəpər əyriliyi və əlindəki üç sümük sınığının əməliyyatı bir gündə icra olunub. O, bu çətin və məsuliyyətli prosesi uğurla yerinə yetirən dr. Pərviz Aslanov və travmatoloq dr. Nicat Səttarova dərin minnətdarlığını bildirib.

“Bir gündə iki əməliyyat keçirmək çox ağır prosesdi. Bu məsuliyyəti öz üzərinə götürən həkimlərimizə dərin təşəkkür edirəm. Allah sizləri qorusun, dəyərli doktorlar!” – deyə Rəfail Ağayev bildirib.

Qeyd edək ki, Rəfail Ağayev Azərbaycan idman tarixində özünü peşəkarlığı, mədəniyyəti və uğurları ilə sevdirən simalardan biridir. Onun bu çətin əməliyyatı uğurla keçməsi sevənləri tərəfindən böyük rəğbətlə qarşılanıb.