Qərbi Azərbaycan İcmasının Sumqayıt nümayəndəliyində Gorus rayonunun Qurdqalaq kənd icmasının yaranmasının bir illiyi münasibətilə iclas keçirilib. Tədbirdə kənd icmasının rəhbərliyi və üzvləri, ictimai fəallar və Qərbi Azərbaycan İcmasının nümayəndələri iştirak ediblər.

Sumqayit.tv-in məlumatına görə, tədbir Azərbaycanın müstəqilliyi və torpaqlarının bütövlüyü uğrunda canlarını fəda edən şəhidlərin xatirəsinin bir dəqiqəlik sükutla yad edilməsi ilə başlayıb.

Toplantının gündəliyində əsasən Qurdqalaq kənd icmasının sədri Fuad Məmmədovun, Ağsaqqallar Şurasının sədri Seyid Əhəd Məmmədovun və Qadınlar Şurasının sədri Mehriban İsmayılovanın bir illik hesabatları dinlənilib. Fuad Məmmədov çıxışında ona və şura rəhbərlərinə göstərilən etimada görə, kənd sakinlərinə minnətdarlığını bildirərək, gələcək fəaliyyətlərini Qərbi Azərbaycan İcmasının nizamnaməsinə və Qayıdış Konsepsiyasına uyğun olaraq daha da gücləndirəcəklərini qeyd edib.

Tədbirdə çıxış edən QAİ Sumqayıt nümayəndəliyinin İdarə Heyətinin üzvü, Qurdqalaq kənd sakini Elçin Abdullayev görülən işləri yüksək qiymətləndirərək, fəaliyyətin daha da sistemli və çevik şəkildə davam etdirilməsinin vacibliyini vurğulayıb.

Digər çıxış edənlər — Seyid Əhəd Məmmədov, Mehriban İsmayılova, Firudin Əsgərov, Rəşid Qasımov və Səyyad Cavadov da icmanın fəaliyyətini müsbət qiymətləndirərək, Qərbi azərbaycanlı olaraq bu yolda hər cür dəstəyə hazır olduqlarını bildiriblər.

Tədbirin sonunda Qərbi Azərbaycan İcması tərəfindən hazırlanmış vəsiqə və döş nişanları kənd sakinlərinə təqdim olunub, sonda isə xatirə şəkli çəkilib.

12-05-2025, 11:20 256