Sumqayıt Dövlət Universitetində (SDU) 2025/2026-cı tədris ili üzrə təkrar ali təhsil almaq istəyən namizədlərlə müsahibə mərhələsi təşkil olunub.

Sumqayit.tv xəbər verir ki, universitetin Böyük akt zalında keçirilən görüşdə çıxış edən Tədris Metodik Mərkəzinin direktoru, dosent Osman Hacıyev, SDU-nun tələbəyönümlü yanaşmasını vurğulayaraq təkrar ali təhsil proqramının əmək bazarının dəyişən tələblərinə cavab verdiyini bildirib. Qeyd olunub ki, bu proqram vasitəsilə yeni ixtisaslara yiyələnmək istəyənlər üçün geniş imkanlar yaradılır.

Təkrar ali təhsil üzrə qəbul əyani və qiyabi formada, yalnız Azərbaycan bölməsi üzrə aparılır. Cari tədris ili üzrə sənəd qəbulu 30 ixtisas üzrə həyata keçirilir.

Dosent Osman Hacıyev, həmçinin, tədris keyfiyyəti və qəbul prosesində şəffaflığın universitet üçün prioritet olduğunu diqqətə çatdırıb.

Müsahibə mərhələsində namizədlər ixtisaslar üzrə yaradılmış komissiyalar tərəfindən fərdi şəkildə dinlənilib. Onların əvvəlki təhsil təcrübəsi və seçdikləri ixtisas üzrə məlumatlılığı əsas götürülərək qiymətləndirmə aparılıb. Görüş zamanı iştirakçıların sualları da cavablandırılıb.