Sumqayıt şəhərində hər il olduğu kimi, bu il də şəhər rəhbərliyinin tapşırığına əsasən genişmiqyaslı dezinfeksiya tədbirləri həyata keçirilir. Sumqayit.tv xəbər verir ki, bu tədbirlər əhalinin sağlamlığının qorunması, sanitariya-gigiyena vəziyyətinin yaxşılaşdırılması və yoluxucu xəstəliklərin qarşısının alınması məqsədi daşıyır.

Növbəti belə tədbir bu gün 9-cu mikrorayon ərazisində reallaşdırılıb. Ərazidəki binaların həyətləri, məhəllədaxili yollar, zibil konteynerləri ətrafı və ümumi istifadə olunan sahələr xüsusi məhlullarla dezinfeksiya olunub.

Dezinfeksiya işləri müvafiq texnika və qoruyucu vasitələrlə təchiz olunmuş ixtisaslı əməkdaşlar tərəfindən həyata keçirilib. Sakinlərdən xahiş olunub ki, bu zaman təhlükəsizlik qaydalarına əməl etsinlər və əməkdaşlarla əməkdaşlıq etsinlər.

Sumqayıt şəhər İcra Hakimiyyətinin müvafiq qurumları tərəfindən dezinfeksiya tədbirlərinin digər mikrorayon və yaşayış massivlərində də mərhələli şəkildə davam etdirilməsi nəzərdə tutulur.