Son günlər sosial şəbəkələrdə Sumqayıt küçələrində dövlət qeydiyyat nişanı olmadan təhlükəli manevrlər edən motosiklet sürücüsünə dair yayılan görüntülər geniş ictimai narahatlığa səbəb olub.

Sürət həddi və yol hərəkəti qaydalarını kobud şəkildə pozan bu şəxs digər hərəkət iştirakçıları üçün ciddi təhlükə yaradıb.

Sumqayit.tv-yə Daxili İşlər Nazirliyinin Mətbuat Xidmətindən verilən məlumata görə, yayılan videogörüntülər əsasında dərhal araşdırmalara başlanılıb. Sumqayıt Şəhər Polis İdarəsinin Dövlət Yol Polisi Şöbəsinin əməkdaşları tərəfindən keçirilən tədbirlər nəticəsində həmin şəxs, 1998-ci il təvəllüdlü Abbasov Kamil Kamal oğlu müəyyən edilərək saxlanılıb.

Kamil Abbasovun davranışı "motoxuliqanlıq" xarakteri daşıdığından, barəsində İnzibati Xətalar Məcəlləsinin müvafiq maddələri ilə protokol tərtib olunub. Sumqayıt Şəhər Məhkəməsinin qərarı ilə o, 15 sutka inzibati qaydada həbs edilib.

Daxili İşlər Nazirliyi və Sumqayıt DYP vətəndaşlara müraciət edərək bildirir ki, yol hərəkəti qaydalarının pozulması yalnız sürücünün deyil, bütün cəmiyyətin təhlükəsizliyinə təhdid yaradır. Belə hallarla qarşılaşdıqda dərhal hüquq-mühafizə orqanlarına məlumat verilməsi tövsiyə olunur.

Dünən, 12:39 56