İctimai nəqliyyatda kondisionerlərin işləməməsi ilə bağlı narazılıqlara AYNA-nın mətbuat katibi Tural Orucov Sumqayıt TV-yə münasibət bildirib.

 Anomal istilərin davam etdiyi bu yay günlərində ictimai nəqliyyatdan istifadə edən sərnişinlərin rahatlığı və sağlamlığı xüsusi əhəmiyyət kəsb edir. Son günlər sərnişinlər arasında kondisionerlərin işləmədiyi avtobuslarla bağlı narazılıqlar artmaqdadır. Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov Sumqayıt TV-nin sorğusunu cavablandırıb.

 

AYNA rəsmisinin bildirdiyinə görə, hər il yay mövsümü başlamazdan əvvəl sərnişindaşıma fəaliyyəti göstərən daşıyıcılara rəsmi qaydada xəbərdarlıq məktubu göndərilir və havaların temperaturuna uyğun olaraq avtobuslardakı sərinləndirmə sistemlərinin işlək vəziyyətə gətirilməsi tapşırılır.
“Bu məsələ tərəfimizdən daimi diqqətdə saxlanılır. Kondisionerlə təchiz edilmiş avtobuslarda soyutma sisteminin işlək vəziyyətdə olması müşahidə edilir,” – deyə Tural Orucov qeyd edib.
Lakin o bildirib ki, bəzi hallarda kondisioner sistemində texniki nasazlıq yarana bilər.
“Belə olan halda nasazlığın tez bir zamanda aradan qaldırılması ilə bağlı daşıyıcıya xəbərdarlıq edilir və tədbir görülməsi tələb olunur,” – AYNA-nın mətbuat katibi əlavə edib.
AYNA ictimai nəqliyyatda bu cür hallarla qarşılaşan sərnişinləri şikayətlərini aidiyyəti üzrə quruma çatdırmağa çağırır.

Məleykə XANKİŞİYEVA
Sumqayit.tv