2008-ci ildə anadan olan Davıdov Uğur Samir oğlu Sumqayıt şəhəri 11 nömrəli tam orta məktəbin (rus bölməsi) 11C sinfini 2025-ci ildə bitirib. Dövlət İmtahan Mərkəzinin keçirdiyi qəbul imtahanında 677.2 bal toplayaraq Azərbaycan Tibb Universitetinin Tibb fakültəsinə qəbul olub.

Uğur uşaqlıqdan ən böyük arzusunu – həkim olmağı qarşısına məqsəd qoymuşdu. Məktəb illərində həmişə yüksək nəticələri ilə seçilən Uğur müəllimlərinin də diqqətini çəkib. Onun fərqli düşüncə tərzi, suallara standart cavablardan kənar yanaşma bacarığı gələcək uğurlarına möhkəm zəmin yaradıb.

O, yalnız dərslərdə deyil, idmanda da böyük nailiyyətlər qazanıb. Şahmatla peşəkar şəkildə məşğul olan Uğur səbri, strateji düşüncəni və foto-yaddaşı bu idmandan öyrənib. Bu qabiliyyətlər isə dərslərdə və imtahanlara hazırlıqda ona xüsusi üstünlük qazandırıb.

Eyni zamanda futbol və cüdo ilə də maraqlanaraq yarışlarda uğurlar qazanıb. Lakin bütün bu uğurlara baxmayaraq, uşaqlıqdan ürəyində daşıdığı həkim olmaq arzusu onun üçün ən böyük məqsəd olub.

Bu gün isə Uğur böyük qürurla deyir:

“İnsan öz ulduzunun arxasınca getməlidir — gec də olsa, çətin də olsa, həmin ulduz onun yolunu işıqlandıracaq.”

Əzmi, bacarığı və çoxşaxəli istedadı ilə Uğur həm məktəbinin, həm də Sumqayıtın fəxridir!