Sumqayıtda yerləşən köhnə “Simurq” restoranının bacasından çıxan tüstü sakinlərin narazılığına səbəb olub.

Şəhər sakinlərinin Sumqayit.tv-yə verdiyi məlumata görə, hər gün axşam saat 18:30-dan 19:00-a qədər restoranın bacasından qalxan tüstü ətraf ərazini bürüyür. Bu isə həm insanların gündəlik rahatlığına, həm də ekologiyaya mənfi təsir göstərir.

Qeyd edək ki, bu problem təkcə “Simurq” restoranı ilə məhdudlaşmır. Ümumiyyətlə, uzun müddətdir ki, Sumqayıtdakı restoran və şadlıq evlərinin bacalarından çıxan tüstü ilə bağlı narazılıqlar tez-tez səsləndirilir.

Məsələ ilə bağlı mütəxəssislər bildirirlər ki, problemin həlli üçün aşağıdakı tədbirlərin görülməsi vacibdir:

Restoran və şadlıq evlərində filtr və təmizləyici qurğuların quraşdırılması;

İstifadə olunan yanacaq və mətbəx avadanlıqlarının ekoloji normalara uyğunlaşdırılması;

Ekologiya və aidiyyəti qurumlar tərəfindən müntəzəm monitorinqlərin aparılması;

Qaydalara əməl etməyən obyektlərə qarşı inzibati tədbirlərin gücləndirilməsi.

Sakinlər ümid edirlər ki, məsələ ilə bağlı aidiyyəti qurumlar qısa zamanda tədbir görəcək və şəhərin ekoloji mühiti qorunacaq.