Sumqayıtda ictimai nəqliyyatda ödəniş sistemi ilə bağlı illərdir həllini tapmayan problem qalır.

Bir neçə il əvvəl şəhər avtobuslarına elektron ödəniş üçün validator cihazları quraşdırılsa da, cəmi bir neçə ay işlədikdən sonra sistem ləğv edilib. O vaxtdan bu günə qədər yenilənmə və ya bərpa prosesi aparılmayıb.

Hazırda avtobuslarda köhnə validatorlar qalsa da, işləmədiyi üçün sərnişinlər ödənişi yalnız nağd şəkildə edə bilirlər. Bu vəziyyət isə vaxtilə kartlarına vəsait yükləyən sərnişinlərin pullarının illərdir istifadəsiz qalmasına səbəb olub.

Daimi izləyicilərimizdən biri Sumqayit.tv-yə bildirib ki, kartına 50 manat yükləsə də, həmin vəsaitdən istifadə edə bilmir:
“Validatorlar işləmədiyi halda hələ də avtobuslarda qalıb. Nə işləyir, nə də yenilənir” – deyə o qeyd edib.

Qeyd edək ki, sözügedən vəziyyət yalnız bir marşrutda deyil, 8, 3 və 10A nömrəli avtobuslarda da müşahidə olunur.