Sumqayıt Dövlət Dram Teatrında tanınmış şair-publisist, pedaqoq Əvəz Mahmud Lələdağın 90 illik yubileyi münasibətilə tədbir keçirilib.

Tədbirdə şəhər rəhbərliyi, millət vəkilləri, ziyalılar və ədəbi ictimaiyyətin nümayəndələri iştirak ediblər. Çıxış edənlər Əvəz Mahmudun Azərbaycan ədəbiyyatına, təhsilinə və ictimai həyatına verdiyi töhfələri yüksək qiymətləndiriblər.

Sumqayıt Şəhər İcra Hakimiyyətinin başçısı Zakir Fərəcov bildirib ki, yubilyar pedaqoq və ictimai xadim kimi şəhərin ictimai-siyasi və mədəni həyatında fəal olub, daim Sumqayıtın adını ucaldıb. Onun müxtəlif illərdə “Ən yaxşı müəllim”, “Tərəqqi” medalı, Prezidentin fəxri diplomu və “Heydər Əliyevin 100 illiyi” yubiley medalı ilə təltif olunduğu qeyd olunub.

Əvəz Mahmud Lələdağa Fəxri Fərman təqdim edilib, həmçinin onun Sumqayıtın Fəxri Vətəndaşı adına layiq görüldüyü elan olunub.

Çıxış edənlər vurğulayıblar ki, yubilyar uzun illər pedaqoji fəaliyyət göstərib, yüzlərlə şagird yetişdirib, onlarla kitab və yüzlərlə elmi-publisistik məqalə ilə ədəbi ictimaiyyətin rəğbətini qazanıb.

Tədbir ədəbi-bədii kompozisiya, şeirlərin səsləndirilməsi və yubilyarın həyatına həsr olunmuş filmin nümayişi ilə davam edib.