Prezident İlham Əliyevin imzaladığı Fərmana əsasən, yeni yaradılacaq “İctimai nəqliyyat” Məqsədli Büdcə Fondu vasitəsilə Bakı, Sumqayıt, Gəncə, Naxçıvan, Xankəndi şəhərlərində və Abşeron, Ağdam, Şuşa, Laçın rayonlarında ictimai nəqliyyatda yeni ödəniş qaydaları tətbiq olunacaq.

Artıq Sumqayıtda da avtobus gedişhaqqı məsafəyə görə hesablanacaq. Yəni yaxın məsafəyə gedən sərnişin daha az, uzaq məsafəyə gedən isə daha çox ödəniş edəcək. Bu sistemdən toplanan vəsait Fond vasitəsilə daşıyıcı şirkətlərə ödəniləcək.

Sumqayit.tv-in məlumatına görə, Nəqliyyat üzrə ekspert Yasin Mustafayev Bizim.Media-ya bildirir ki, bu addım həm sərnişinlərin, həm də şirkətlərin maraqlarını qoruyacaq:

“Yeni qaydalarla sürücülər sərnişin sayına görə yox, məsafəyə görə ödəniş alacaq. Bu isə onların sərnişin uğrunda yarışmasının qarşısını alacaq”.

Qaydalara əsasən, 2026-cı ilin yanvarın 1-dən etibarən avtobus sürücüləri sərnişin toplamaq üçün bir-biri ilə rəqabət aparmayacaq, marşrut xətti üzrə məsafəyə görə ödəniş sistemi tətbiq ediləcək.

Yeni yanaşma həm sərnişinlərin təhlükəsizliyini, həm də ictimai nəqliyyatın dayanıqlı işləməsini təmin etməyə yönəlib.