Sumqayıt şəhərinin 9-cu mikrorayonunda, Araz marketin qarşısındakı piyada keçidindən istifadə edən sakinlər ciddi narazılıq bildirirlər.

Sakinlərin Sumqayit.tv-yə göndərdiyi videomaterialda görünür ki, piyada zolağının üzərində avtomobillər dayanaraq piyadaların hərəkət yolunu tam şəkildə bağlayır.

Bu səbəbdən piyadalar, xüsusilə yaşlı insanlar və uşaqlı valideynlər iki avtomobilin arasından keçməyə məcbur olur. Sakinlərin sözlərinə görə, bəzi hallarda piyadalar faktiki olaraq avtomobilə toxunaraq onun üzərindəki tozu paltarlarına çəkməli olurlar. İri cüssəli şəxslər isə ya avtomobillərin üstündən keçmək riski ilə üzləşir, ya da geri dönməyə məcbur qalır, çünki avtomobillər arasında keçid üçün boşluq demək olar ki, yoxdur.

Problem bununla da bitmir. Həmin zolaqdan keçib yolun digər tərəfinə — Bəyaz Saray istiqamətinə — çıxarkən piyada keçidi birbaşa köşkün (butkanın) üstünə düşür. Bu, piyadaların hərəkətini qeyri-mümkün edir və zolaqların ümumiyyətlə düzgün planlaşdırılmadığını göstərir.

Şikayətçilər bildirir ki, bu vəziyyət uzun müddətdir davam edir və ərazidə nəzarət zəifdir. Onlar aidiyyəti qurumlardan — xüsusilə də Sumqayıt Şəhər Dövlət Yol Polisi şöbəsindən — ərazidə nəzarətin gücləndirilməsini və problemin aradan qaldırılması üçün tədbirlər görülməsini tələb edirlər.

Qeyd edək ki, piyada zolağında dayanma və durma qanunla qadağandır. Bu cür hallar həm inzibati məsuliyyət yaradır, həm də yol-nəqliyyat təhlükəsizliyi üçün ciddi təhdid hesab olunur.

Sumqayit.tv məsələ ilə bağlı yol polisi və digər aidiyyəti qurumların rəsmi mövqeyini öyrənməyə hazırdır.

9-11-2025, 23:22 3