Sumqayıt Dəmiryol Vağzalının qarşısında əhaliyə keyfiyyətli ictimai nəqliyyat xidmətlərinin göstərilməsi məqsədilə yeni nəqliyyat mübadilə mərkəzi yaradılıb.

Sumqayıt.tv xəbər verir ki, AYNA-dan verilən məlumata görə, mərkəzdə avtobusların maneəsiz hərəkətini təmin etmək üçün xüsusi hərəkət zolaqları və sərnişinlərin təhlükəsiz minib-düşməsi üçün dayanacaq məntəqələri təşkil edilib. Ərazidə nişanlanma işləri həyata keçirilib, müvafiq nişanlar quraşdırılıb. Dəmir yolu vağzalının qarşısında minik avtomobillərinin xaotik parklanmasının qarşısını almaq üçün yeni parklanma yerləri yaradılıb.

Piyada təhlükəsizliyinin təmin edilməsi məqsədilə ilkin mərhələdə delinatorlarla təchiz olunmuş piyada zonaları salınıb.

Hazırda Sumqayıt Dəmiryol Vağzalında 5 marşrut xətti üzrə (5, 6, 10A, 22, 39 nömrəli) 40 avtobus fəaliyyət göstərir. Şəhərin müxtəlif ərazilərindən əlavə marşrutların təşkili də nəzərdə tutulub.

Yeni nəqliyyat mübadilə mərkəzinin istifadəyə verilməsi ilə Sumqayıtda ictimai nəqliyyatın əlçatanlığı və sərnişinlərin təhlükəsizliyi artırılacaq.

Selcan Yusif