Sumqayıt şəhərinin 15-ci məhəlləsində – Asan Xidmətin arxasında yerləşən 5 saylı yataqxananın sakinləri uzun müddətdir davam edən tikinti işlərindən narazıdır.
Sakin Kazımov Həsən Söhbət oğlu Sumqayit.tv-yə müraciət edərək bildirib ki, “Sumqayıt Bağları” adı ilə fəaliyyət göstərən tikinti şirkəti təxminən 3 aya yaxındır qazıntı işləri aparır və bu proses evlərə ciddi ziyan vurub.

Onun sözlərinə görə, qazıntılar zamanı binanın divarlarında iri çatlar əmələ gəlib, evdə oturmaq belə təhlükəyə çevrilib. Sakin deyir ki, tikinti işləri barədə heç bir xəbərdarlıq edilməyib və müraciətlərə baxılmır:

“Defələrlə şirkətə, polisə və Fövqəladə Hallar Nazirliyinə müraciət etmişik, amma heç bir qurum reaksiya vermir. Öz bildikləri kimi işi aparırlar.”

Şikayətçi qeyd edir ki, ən acınacaqlısı ailənin sağlamlıq imkanları məhdud olan bir uşağının olmasıdır. Sakin bildirir ki, övladı serebral iflic xəstəsidir və Prezident təqaüdçüsüdür. Tikinti zamanı yaranan səs-küy, vibrasiya və toz onun səhhətini daha da ağırlaşdırır

“Uşaq iş gedən vaxt sudurğa tutur, səhhəti pisləşir. Hər gün qorxu içindəyik. Divarlar çatlayıb, istənilən an uçma təhlükəsi var.”

Sakin bildirir ki, tikinti şirkəti ya ailəni təhlükəsiz evlə təmin etməli, ya da kompensasiya verərək onların başqa yerə köçməsinə şərait yaratmalıdır:

“Müraciətimin səbəbi düşdüyümüz vəziyyətdən çıxmağımıza aiduyyatı qurumların köməklik göstərməsidir. Bizə ya ev versinlər, ya kompensasiya. Uşağımı belə təhlükənin içində saxlaya bilmirəm.”

Sumqayit.tv məsələ ilə bağlı tikinti şirkəti və aidiyyəti dövlət qurumları ilə əlaqə saxlamağa çalışır. Yaxın zamanda rəsmi mövqeləri dərc ediləcək.

5-12-2025, 11:55 66