Sumqayıt şəhərinin 15-ci məhəlləsində yerləşən 5 saylı yataqxananın sakinlərinin tikinti işləri ilə bağlı şikayətindən sonra Sumqayit.tv məsələni aydınlaşdırmaq üçün şəhər İcra Hakimiyyətinə sorğu ünvanlamışdı. Artıq qurumun rəsmi cavabı daxil olub.

Sumqayıt Şəhər İcra Hakimiyyətinin mətbuat xidmətinin rəhbəri Eyvaz Qocayev sorğuya cavab olaraq bildirib ki, şəhərdə yenidənqurma və köhnə binaların mərhələli şəkildə sökülməsi prosesi hazırda geniş miqyasda davam etdirilir.

Onun sözlərinə görə, bu işlər qəbul olunmuş baş plana uyğun şəkildə aparılır və məqsəd köhnəlmiş, istismar müddətini başa vurmuş binaların yerində daha təhlükəsiz və müasir yaşayış komplekslərinin inşa edilməsidir:

“Sumqayıt şəhərinin baş planına uyğun olaraq genişmiqyaslı abadlaşdırma və yenidənqurma işləri aparılır. Köhnə, istismar müddətini başa vurmuş binalar mərhələli şəkildə sökülür və onların əvəzinə müasir, dayanıqlı yaşayış kompleksləri tikilir.”

E.Qocayev qeyd edib ki, proses hazırda şəhərin bir sıra yaşayış massivlərində — 4-cü, 15-ci, 16-cı, 17-ci və 21-ci məhəllələrdə ardıcıl formada davam etdirilir. O, əlavə edib ki, mərhələli şəkildə digər ərazilər də bu layihəyə daxil ediləcək.

Qeyd edək ki, 15-ci məhəllədə aparılan tikinti işlərindən narazı qalan sakinlərin müraciətini ötən həftə Sumqayit.tv-də işıqlandırılmışdı.

8-12-2025, 12:18 33