Paytaxtda məişət səs-küyünə qarşı aparılan nəzarət-profilaktik tədbirlər fonunda Sumqayıtda da vəziyyət fərqli deyil. Şəhər sakinləri gecə saatlarında kafe-restoran və əyləncə obyektlərindən yayılan yüksək səs-küy səbəbindən narahat olduqlarını bildirirlər.
Sumqayit.tv-yə daxil olan çoxsaylı şikayətlərə əsasən, xüsusilə istirahət günləri və gecə 00:00-dan sonra səsgücləndiricilərlə yayımlanan musiqilər yaşayış binalarında ciddi narahatlıq mənbəyinə çevrilir.

Sakinlərin sözlərinə görə, bir çox iaşə obyektləri mövcud qanunvericiliyin tələblərinə məhəl qoymadan yüksək səsli musiqini dayandırmır, bu isə insanların istirahət hüququnun pozulmasına səbəb olur:

“Uşaqlar yatmır, yaşlılar narahat olur. Dəfələrlə şikayət etmişik, amma hələlik ciddi tədbir görülməyib”, – deyə şəhər sakinləri bildirirlər.

Sakinlər Sumqayit.tv-yə daxil olan müraciətlərində bildirirlər ki, elə restoranlar və PUB-lar var ki, gecə yarıya qədər, bəzən isə saat 03:00–04:00-dək fəaliyyət göstərərək insanların istirahətinə ciddi maneə yaradırlar.

Bakı və digər bölgələrdə polis əməkdaşlarının bu istiqamətdə reydlər keçirməsi fonunda Sumqayıt sakinləri də oxşar nəzarət-profilaktik tədbirlərin şəhərdə mütəmadi olaraq aparılmasını istəyirlər. Onlar hesab edirlər ki, səs-küyə yol verən obyektlər barəsində profilaktik söhbət aparılmalı, qanunvericiliyə uyğun cərimə və digər tədbirlər tətbiq edilməlidir.

Şikayətlər əsasən bulvar ətrafı obyektlər, məhəllədaxili restoranlar və qapalı məkanlarda keçirilən gecə tədbirləri ilə bağlıdır. Sakinlər aidiyyəti qurumları bu məsələni diqqətdə saxlamağa çağırırlar.

Müəllif: Sumqayit.tv

11-12-2025, 10:53 52