Sumqayıtın bir neçə yaşayış massivində – Xəzər bağları (Qala dərəsi küçəsi), İnşaatçılar qəsəbəsi, Yaşıl dərə massivi (Qayalı market istiqaməti), Corat qəsəbəsi və Kimyaçılar qəsəbəsi (Sultan Məcid Qənizadə küçəsi) üzrə yol infrastrukturu ilə bağlı şikayətlər günbəgün artır. Sumqayit.tv-in ünvanına daxil olan çoxsaylı video-müraciətlər sakinlərin narahatlığının nə qədər ciddi olduğunu bir daha təsdiqləyir.

Yollarda illərlə aparılmayan təmir nəticəsində çala-çuxurlar, batmış hissələr və dağılmış asfalt örtüyü xüsusilə qış aylarında keçilməz vəziyyət yaradır. Yağış və palçıq səbəbindən avtomobillər hərəkət etməkdə çətinlik çəkir, piyadalar isə gündəlik gediş-gəlişdə real təhlükə ilə üz-üzə qalır.

Sakinlərin sözlərinə görə, aidiyyəti qurumlara – xüsusən Sumqayıt şəhər bələdiyyəsinə dəfələrlə müraciət olunsa da, faktiki nəticə müşahidə edilmir. İnsanlar bildirirlər ki, “yalnız sözlə yola verilir, amma ərazidə dəyişiklik yoxdur”.

Daha narahatedici məqamlardan biri isə həmin küçələrdə şəhid ailələrinin də yaşamasıdır. Sakinlər haqlı olaraq sual edirlər:
"Əgər şəhid ailələrinin yaşadığı küçələr belə bu vəziyyətdə qalırsa, adi vətəndaşın yol problemi nə vaxt həll olunacaq?"

Hazırkı durum artıq təkcə məişət narahatlığı deyil, nəqliyyat, təhlükəsizlik və sosial rifah problemi kimi gündəmə gəlir.

Sumqayıt TV olaraq daxil olan bütün müraciətləri ictimailəşdiririk və məsələni gündəmdə saxlamağa davam edəcəyik. Ümid edirik ki, aidiyyəti qurumlar tez bir zamanda real tədbirlər görəcək və sözügedən ərazilərdə normal yol infrastrukturu təmin ediləcək.

15-12-2025, 17:15 85