Sumqayıt şəhərində səhiyyə infrastrukturunun yenilənməsi ilə bağlı mühüm layihələrin icrası planlaşdırılır.

Sumqayit.tv xəbər verir ki, bu barədə TƏBİB-in İcraçı direktoru Vüqar Qurbanov qurumun 2025-ci ilin yekunları və gələcək planlarına dair keçirilən brifinqdə məlumat verib.

İcraçı direktorun sözlərinə görə, ölkə üzrə istismara yararsız vəziyyətdə olan tibb müəssisələrinin yenidən qurulması, mühəndis-kommunikasiya sistemlərinin yenilənməsi və tibbi xidmətlərin keyfiyyətinin artırılması istiqamətində ardıcıl işlər görülür. Bu layihələr çərçivəsində Sumqayıt şəhəri də prioritet ərazilər sırasında yer alır.

Vüqar Qurbanov bildirib ki, Sumqayıt şəhərində yerləşən 2 nömrəli Ailə Sağlamlıq Mərkəzinin, eləcə də Sumqayıt Şəhər Təcili Tibbi Yardım Xəstəxanasının əsaslı təmiri və yenidən qurulması nəzərdə tutulur. Sözügedən layihələrin icrası nəticəsində Sumqayıt sakinlərinə göstərilən tibbi xidmətlərin əlçatanlığının və keyfiyyətinin artırılması məqsəd qoyulub.

Qeyd edilib ki, aparılacaq əsaslı təmir və yenidənqurma işləri tibb müəssisələrinin maddi-texniki bazasının gücləndirilməsinə, müasir tələblərə cavab verən şəraitin yaradılmasına xidmət edəcək.

19-12-2025, 14:00 94