Hesablama Palatası tərəfindən aparılan səmərəlilik auditi Sumqayıt şəhərində təhlükəsiz tullantıların idarə olunması sahəsində ciddi nöqsanların mövcud olduğunu ortaya qoyub.

Sumqayit.tv xəbər verir ki, audit nəqliyyat vasitələrinin utilizasiyası üzrə operator olan “Təmiz Şəhər” ASC-nin fəaliyyəti ilə bağlı aparılıb və aşkar edilən nöqsanların böyük hissəsinin bu günədək aradan qaldırılmadığı bildirilib.

Hesabatda qeyd olunub ki, Sumqayıt şəhərində “Sumqayıt şəhər Təmizlik Departamenti” MMC-yə məxsus, 110 hektar ərazidə yerləşən tullantıların zərərsizləşdirilməsi poliqonunun kənar hüquqi şəxslərin istifadəsinə verilməsi nəticəsində iqtisadi səmərənin itirildiyi müəyyən edilib. Bununla yanaşı, bu prosesin mövcud hüquqi aktların tələblərinə uyğunlaşdırılmadığı vurğulanıb.

Audit sənədlərinə əsasən, təhlükəsiz tullantıların hərəkəti və idarə olunması sahəsində hüquqi tənzimləmə mexanizmləri yetərli səviyyədə tətbiq edilməyib. Eyni zamanda, dövlət büdcəsinin investisiya xərcləri hesabına alınmış uzunmüddətli aktivlər, o cümlədən yükdaşıyan nəqliyyat vasitələri üzrə amortizasiya normalarının düzgün tətbiq olunmadığı da qeyd edilib.

Hesabatda Sumqayıt şəhəri üzrə kommunal təsərrüfat strukturlarının maliyyə hesabatlarının vaxtında tərtib edilməməsi və aidiyyəti qurumlara təqdim olunmaması halları da diqqətə çatdırılıb. Bu amilin şəffaflığın azalmasına və maliyyə nəzarətinin zəifləməsinə səbəb olduğu bildirilir.

Hesablama Palatası vurğulayıb ki, aşkarlanmış bütün nöqsanlarla bağlı qəbul edilmiş qərarların icrası hazırda izlənilmə mərhələsindədir.

Müəllif: Sumqayit.tv

Mənbə: "Report"

13-01-2026, 13:59 114