Sumqayıtın Z.Tağıyev qəsəbəsinin yollar bərbad vəziyyətdədir, işıqlandırma yoxdur.

Sumqayit.tv-yə Sumqayıt şəhəri Zeynalabdin Tağıyev yaşayış massivi ilə bağlı növbəti şikayət daxil olub.

Sakinlərin bildirdiyinə görə, Z.Tağıyev ərazisində yollar uzun müddətdir tamamilə yararsız vəziyyətə düşüb, əsasən də 5-ci küçəni əhatə edən ərazilərdə küçə işıqlandırması mövcud deyil. Mövcud vəziyyət xüsusilə payız-qış mövsümündə ciddi problemlər yaradır.

Şikayətdə qeyd olunur ki, dəfələrlə icra nümayəndəliyinə və bələdiyyəyə müraciət edilsə də, məsələ ilə bağlı real tədbir görülməyib:

“Hər dəfə deyirlər ki, vəsait yoxdur. Ayırsalar, təmir edəcəyik. Amma illərdir vəziyyət dəyişmir.”

Sakinlər bildirir ki, yolların bərbad olması səbəbindən yağışlı havalarda uşaqları məktəbə piyada göndərmək mümkün deyil. Təhlükəsizlik baxımından valideynlər məcbur qalaraq övladlarını avtomobillə məktəbə aparırlar.

Eyni zamanda küçələrin işıqlandırılmaması axşam və gecə saatlarında təhlükəsizlik riskini daha da artırır, xüsusilə uşaqlar və yaşlılar üçün əlavə təhlükə yaradır.

Sakinlər aidiyyəti qurumlardan ərazidəki yolların təmir olunmasını, küçə işıqlandırmasının bərpa edilməsini və problemin uzunmüddətə deyil, təxirəsalınmaz şəkildə həllini xahiş edirlər.

Sumqayit.tv olaraq məsələni diqqətdə saxlayır, aidiyyəti qurumların mövqeyini işıqlandırmağa hazırıq.

Müəllif: Sumqayit.tv

VİDEO LİNK: (9)Sumqayıt TV Official (@sumqayittvofficial) | TikTok

13-01-2026, 17:12 49