Xızı rayonunun "Yeni Yaşma" qəsəbə sakinləri uzun illərdir həllini tapmayan ciddi bir problemlə üz-üzə qalıblar.
Sakinlərin Sumqayit.tv-yə müraciətində bildirilir ki, qəsəbədə kanalizasiya sistemi mövcud deyil və bu vəziyyət gündəlik həyatı dözülməz hala salıb.

Şikayətdə qeyd olunur ki, qəsəbədə bütün həyətlərdə kanalizasiya olmadığı üçün kustar üsulla qazılmış çirkab quyularından istifadə olunur. Nəticədə həyətlər çirkab suları ilə dolur, antisanitar şərait yaranır. Maddi imkanı olan sakinlər müəyyən aralıqlarla bu quyuları təmizlətdirsələr də, imkanı olmayan ailələr xüsusilə yay aylarında ağır sanitar vəziyyətlə, qış aylarında isə palçıq və üfunətlə yaşamaq məcburiyyətində qalırlar.

Sakinlər bildirirlər ki, müasir dövrdə, xüsusilə müxtəlif virus və infeksiyaların yayıldığı bir zamanda belə bir şəraitdə yaşamaq sağlamlıq üçün ciddi təhlükə yaradır və sosial-iqtisadi problemləri daha da dərinləşdirir.

"Yeni Yaşma" sakinləri aidiyyəti qurumlara, xüsusilə Xızı Rayon İcra Hakimiyyətinin başçısı Xəzər Aslanova müraciət edərək, bu məsələnin indiyədək hansı səviyyədə qaldırıldığı və niyə hələ də həll olunmadığı ilə bağlı suallar ünvanlayırlar. Onlar bildirirlər ki, daha əvvəl verilmiş şifahi vədlər hələ də reallaşmayıb.

Sakinlər xahiş edirlər ki, problemin həlli üçün Maliyyə Nazirliyi qarşısında məsələ qaldırılsın, maliyyə maneələri aradan qaldırılsın və qəsəbəyə kanalizasiya sisteminin çəkilməsi üçün real addımlar atılsın.

Sumqayit.tv məsələni diqqətdə saxlayacaq və aidiyyəti qurumların mövqeyini işıqlandırmağa hazırdır.

24-01-2026, 16:44 82