Sumqayıt–Lökbatan istiqamətində fəaliyyət göstərən 509 nömrəli müntəzəm avtobus marşrutu ilə bağlı vətəndaş şikayəti gündəm yaradıb.
Sumqayit.tv-yə müraciət edən Sumqayıt sakini Niyaz Aslanzadə bildirib ki, təxminən iki ildir hər gün Sumqayıt avtovağzalından Lökbatan dairəsinə getmək üçün 509 nömrəli avtobusdan istifadə edir. Onun sözlərinə görə, sonradan məlum olub ki, marşrutun rəsmi hərəkət sxeminə əsasən avtobus Lökbatan qəsəbəsinə daxil olmalıdır.
İzləyici qeyd edir ki, bu məlumatı həm AYNA-nın rəsmi saytında yerləşdirilən marşrut xəritəsində, həm də qaynar xətt operatoru ilə əlaqə saxladıqdan sonra dəqiqləşdirib. Lakin real vəziyyət fərqlidir:
“İki ildir həmin avtobus Lökbatan qəsəbəsinə girmir. Sürücü və dispetçer hər dəfə bildirir ki, son dayanacaq Binə Ticarət Mərkəzidir. Mən də bu səbəbdən hər gün əlavə yol pulu ödəyərək başqa avtobusla Lökbatana gedirdim.”
Vətəndaş məsələ ilə bağlı Azərbaycan Yerüstü Nəqliyyat Agentliyinə (AYNA) rəsmi şikayət ünvanladığını, lakin qurumdan gələn cavabın reallıqla üst-üstə düşmədiyini iddia edir. AYNA-nın İdarə Heyətinin sədr müavini Heydər Rüstəmovun imzaladığı cavab məktubunda 509 nömrəli marşrut üzrə hərəkət sxeminə əməl olunduğu bildirilib.
İzləyici isə bu cavabı əsassız sayır və bildirir ki, cavab məktubundan bir gün əvvəl və bir gün sonra da eyni marşrutla hərəkət edib və vəziyyət dəyişməyib:
“Cavabdan sonra da avtobus yenə Lökbatana girmədi. Sürücü yenə eyni sözləri dedi. Bu halda ya araşdırma aparılmayıb, ya da araşdırma barədə rəhbərliyə yanlış məlumat verilib.”
Vətəndaş məsələ ilə bağlı həm marşrut xəttindəki özbaşınalığın, həm də rəsmi qurumun verdiyi cavabın obyektivliyinin araşdırılmasını xahiş edir. O, AYNA-dan göndərilən cavab məktubunun surətini də redaksiyamıza təqdim edib.
Sumqayit.tv məsələni aydınlaşdırmaq üçün AYNA-ya sorğu ünvanlayıb.
2-02-2026, 14:43
148
