Dünən Sumqayıtda yerləşən 33 nömrəli tam orta məktəbdə sinif yoldaşı tərəfindən döyüldüyü iddia olunan uşaqla bağlı dövlət qurumları açıqlama veriblər.

Sumqayit.tv xəbər verir ki, Daxili İşlər Nazirliyinin Mətbuat Xidmətindən Oxu.az-ın sorğusuna cavab olaraq bildirilib ki, Sumqayıt şəhərində yerləşən məktəblərin birində iki şagird arasında mübahisə baş verməsi ilə bağlı polisə məlumat daxil olub.

Məlumatda qeyd olunub ki, faktla bağlı müvafiq ekspertiza təyin edilib:

"Hazırda ərazi polis orqanında araşdırma aparılır".

Abşeron-Xızı Regional Təhsil İdarəsindən  Oxu.az-ın sorğusuna cavab olaraq qeyd olunub ki, fevralın 5-də Sumqayıt şəhər 33 nömrəli tam orta məktəbdə 7-ci sinif şagirdləri arasında yaranmış mübahisə zamanı biri digərinə xəsarət yetirib.

Məlumatda qeyd olunub ki, hadisə dərhal məktəb rəhbərliyi tərəfindən nəzarətə götürülüb:

"Xəsarət alan şagirdə yerində ilkin tibbi yardım göstərilib, dərhal təcili tibbi yardıma, hüquq-mühafizə orqanlarına və şagirdlərin valideynlərinə məlumat verilib. Məktəbli təcili tibbi yardım xidməti vasitəsilə tibb müəssisəsinə aparılıb. Faktla bağlı hüquq-mühafizə orqanları tərəfindən araşdırma aparılır".

Məlumatda əlavə olunub ki, hər iki şagirdin fiziki və psixoloji durumu məktəb rəhbərliyi və idarə tərəfindən izlənilir:

"Qeyd edirik ki, idarə, məktəb rəhbərliyi və hüquq-mühafizə orqanları tərəfindən mövcud qaydalar çərçivəsində lazımi tədbirlər görülür. Aparılan araşdırmanın nəticələri aidiyyəti qurumlar tərəfindən ictimaiyyətə veriləcək. Uşaqların yeniyetməlik dövrü olduğunu, araşdırma prosesinin davam etdiyini nəzərə alaraq ictimaiyyətdən də bu mövzuda daha həssas davranmalarını, paylaşımlarda rəsmi qurumların açıqlamalarına istinad etməyi xahiş edirik".

6-02-2026, 12:49 46