Sumqayıt şəhərində yol hərəkəti qaydalarını pozan avtobus sürücülərinə qarşı profilaktik tədbir keçirilib.

Sumqayit.tv xəbər verir ki, Daxili İşlər Nazirliyinin yaydığı məlumata görə, son günlər sosial şəbəkələrdə bəzi sürücülərin sükan arxasında mobil telefondan istifadə etməsi və qaydaları kobud şəkildə pozması ilə bağlı görüntülər yayılıb.

Bununla əlaqədar Sumqayıt Şəhər Polis İdarəsinin Dövlət Yol Polisi Şöbəsinin əməkdaşları sərnişindaşıma ilə məşğul olan sürücülərlə görüş keçirib. Reysdə olmayan sürücülər polis şöbəsinə dəvət olunaraq qayda pozuntuları monitor vasitəsilə onlara göstərilib və xəbərdarlıq edilib.

Tədbirdə şəhər icra hakimiyyətinin nümayəndələri də iştirak ediblər. Sürücülərə bildirilib ki, sükan arxasında mobil telefondan istifadə etmək, siqaret çəkmək və digər qayda pozuntuları sərnişinlərin həyatını riskə atır.

Profilaktik tədbirlər çərçivəsində piyadalarla da maarifləndirici söhbətlər aparılıb, nizamlanan piyada keçidlərindən düzgün istifadə etməyin vacibliyi izah olunub.

Qeyd olunub ki, Sumqayıtda yol hərəkəti təhlükəsizliyi ilə bağlı bu cür reydlər davam etdiriləcək.

13-03-2026, 14:09 62