Novruz bayramı münasibətilə Sumqayıt şəhərində “Kənddən Şəhərə” yarmarkası təşkil olunub.

Sumqayit.tv xəbər verir ki, yarmarka Kənd Təsərrüfatı Nazirliyinin tabeliyində fəaliyyət göstərən Aqrar Tədarük və Təchizat ASC tərəfindən Kimyaçı Mədəniyyət Sarayının qarşısında təşkil edilib.

Sumqayıt Şəhər İcra Hakimiyyətinin başçısı Zakir Fərəcov yarmarka ərazisində olub, fermerlərlə görüşərək təqdim olunan məhsullarla tanış olub. Bildirilib ki, yarmarkanın keçirilməsində məqsəd bayram günlərində yerli istehsalçıların satış imkanlarını artırmaq və sakinlərin təbii kənd təsərrüfatı məhsullarına çıxışını asanlaşdırmaqdır.

Yarmarkada ölkənin müxtəlif bölgələrindən gətirilən meyvə-tərəvəz, ət və süd məhsulları, bal, quru meyvələr və digər kənd təsərrüfatı məhsulları satışa çıxarılıb. Fermerlər piştaxta və digər zəruri avadanlıqlarla ödənişsiz təmin olunublar.

Qeyd edək ki, yarmarka hər gün saat 09:00-dan 19:00-dək fəaliyyət göstərəcək.

13-03-2026, 16:31 223