“Murov qartalı” ləqəbli kəşfiyyatçı, polkovnik-leytenant Raquf Orucov Aprel döyüşləri zamanı qəhrəmancasına şəhid olub. Onun həyat yolu və döyüş fəaliyyəti Azərbaycan Ordusunun tarixində xüsusi yer tutur.

Raquf Orucov 1990-cı ildə Sovet Qoşunlarında xidmət edib. Qarabağ müharibəsi başladıqdan sonra isə könüllü olaraq Azərbaycan Ordusunun sıralarına qoşulub və ön cəbhədə xidmət etməyə üstünlük verib. Qısa müddət ərzində Fərrux dağı və Aranzəmin kəndi istiqamətində aparılan döyüş əməliyyatlarında iştirak edib və ayağından ağır qəlpə yarası alıb.

Onun ailəsi də müharibənin ağrılarını yaşayıb. Anası Raya Rəhimova 1993-cü il iyunun 12-də Ağdam rayonunun Cinli kəndinin işğalı zamanı şəhid olub. Həmin il Raquf Orucov sənədlərini Bakı Ali Hərbi Ümumqoşun Komandirləri Məktəbinə təqdim edib və təhsilini uğurla başa vurub.

Məzun olduqdan sonra Bakıda yerləşən hərbi hissələrdən birinə təyinat alsa da, o, ön cəbhədə xidmət etməyi seçib. 1996-cı ildə Murovdağa göndərilən Raquf Orucov kəşfiyyat bölüyünün komandiri kimi fəaliyyət göstərib. Murovdağda həyata keçirdiyi uğurlu əməliyyatlara görə hərbçi yoldaşları və komandirlər tərəfindən ona “Murov qartalı” ləqəbi verilib.

2016-cı il aprelin 4-də Ağdərə rayonunun Talış kəndinin işğaldan azad olunması uğrunda gedən döyüşlərdə Xüsusi Təyinatlı Qüvvələrin tərkibində iştirak edən Raquf Orucov son döyüşünə qatılıb və qəhrəmancasına şəhid olub.

“Murov qartalı” Sumqayıt Şəhidlər xiyabanında dəfn olunub. Onun xatirəsi bu gün də ehtiramla yad edilir və göstərdiyi qəhrəmanlıq nümunəsi gənc nəsil üçün örnək olaraq qalır.

4-04-2026, 14:39 40