Redaksiyamıza daxil olan məlumata görə, Stansiya Sumqayıt və Dəmiryolunun Yük Həyəti ərazisində yerləşən yaşayış massivində evlərin böyük hissəsi su altında qalıb.
Sakinlərin Sumqayit.tv-yə bildirdiyinə əsasən, ərazidə uzun illərdir kanalizasiya şəbəkəsinin olmaması vəziyyəti daha da ağırlaşdırıb.

Bildirilib ki, yağış suları ilə “şambo” adlanan tullantı çuxurlarının suları bir-birinə qarışaraq ərazidə kəskin qoxu və sanitar problemlər yaradıb. Sakinlər qeyd edir ki, qəsəbə 2012-ci ildə salınsa da, bu günədək kanalizasiya infrastrukturu qurulmayıb. Onların sözlərinə görə, bu səbəbdən hər güclü yağıntı zamanı ərazi su altında qalır.

Sakinlər bildirirlər ki, mövcud vəziyyət onların gündəlik həyatına ciddi təsir göstərir və problemin təxirəsalınmadan həllini gözləyirlər.

Məlumatda o da vurğulanır ki, yaranmış vəziyyət nəticəsində artıq bəzi evlərdə çatlar əmələ gəlib. İlkin olaraq iki evdə belə halın müşahidə edildiyi bildirilir.

Sakinlər məsuliyyət məsələsinə aydınlıq gətirilməsini və zərər görmüş evlərlə bağlı kompensasiya mexanizminin müəyyən olunmasını tələb edirlər.

Məsələ ilə bağlı aidiyyəti qurumların mövqeyini dərc etməyə hazırıq.

Video Link: (17)Sumqayıt şəhərində aramsız yağan yağışlar bir sıra ərazilərdə ciddi pr... | TikTok

5-04-2026, 10:26 40