Avtomobildə Beynəlxalq Avrasiya Hərəkatının sədri, Rusiyanın ictimai-siyasi xadimi, filosof və politoloq Aleksandr Duqinin qızı, “United World International”ın baş redaktoru Darya Platonova (Dugina) ölüb. O, hadisə yerində keçinib. Daryanın olduğu avtomobil yerli vaxtla saat 21:35-də partlayıb, daha sonra yoldan çıxaraq binaya çırpılıb. Baş verən olayla bağlı Rusiya cəmiyyətində xüsusi mövqeyi olan, Rusiyanı yaxından tanıyan azərbaycanl jurnalist  Fuad Abbasovla söhbətləşdik: 

“ Rusiya ilə Ukrayna arasındakı müharibədən dolayı hər kəs bunu Ukrayna terroru kimi qiymətləndirəcək. Nəticə etibarı ilə Rusiya Hüquq Mühafizə Orqanları bunu Ukrayna terroru kimi qələmə verəcəklər. Amma gəlin yaddan çıxarmayaq ki, Rusiyanın daxilində Putin siyasətinə qarşı çıxan çox sayda adam var. Hansı ki, bu adamlar oliqarx çevrələrə yaxındırlar və nəticə etibari ilə Putindən qisas almaq istəyirlər. O insanların fəaliyyətinin nəticəsidir ki, Avroasiya siyasətinin ən başlıca təbliğatçısı və nəzəriyyəçisi olan, eyni zamanda Putinin baş məsləhətçisi olan Duqin və qızına qarşı olan bu sui-qəsd dediyimiz Avroasiya siyasətinə qarşı atılmış bir addımdır. Yəni istər qlobalistlər olsun, istər liberallar olsun bunların dəstəklədiyi siyasi və iş çevrələri Putinə xəbərdarlıq üçün bu terror aktını həyata keçirmiş ola bilərlər. Əlbəttə ki, Rusiya bunu açıq şəkildə söyləməz. Rusiyanın daxilində klanlararası mübarizənin bir nəticəsi olaraq, Duqinin maşını partladıldı və qızı həlak oldu deməzlər. Bu dəqiqə Ukrayna məsələsi var deyə, Ukraynanın üzərinə yıxılır. Əgər ki olmasaydı 99% bunu Qafqaz kökənli terroristlərin həyata keçirdiyini qələmə verəcəkdilər. Ukrayna məsələsinə qədər Rusiyada meydana gələn bütün neqativ halların hamısının başında Qafqaz kökənli vətəndaşlar dururdu. Amma mənim başlıca fikrim bunun Kremlin qüllələri arasında davam etməkdə olan iqtidar müharibəsinin, saray çevrilişinin bir hazırlığı kimi qiymətləndirirəm".