12 noyabr tarixində Zəngəzur mahalının Qarakilsə (Sisyan) rayonundan olan  şəhidlər üçün anım günü keçrilib.
Sumqayit.tv xəbər verir ki, tədbir Sumqayıt şəhidlər xiyabanını ziyarətlə başlayıb. Ziyarətin ardınca tədbir Saray qəsəbəsində davam etdirilərək,  şəhidlərin ruhu bir dəqiqəlik sükutla yad edilib, Azərbaycanın Dövlət Himni səsləndirilib.  Vətənpərvərlik ruhunda şeir və mahnılar oxunub. Sözü gedən rayondan olan 65 şəhidin adına ehsan verilib, ruhlarına dualar oxunub.
Mərasimdə, Qərbi Azərbaycan İcmasının Qarakilsə  rayonunun rəhbəri Nadir Qəhrəmanov açılış nitqi söyləyib.  Əslən Qarakilsə rayonundan olan ağsaqqallar, o cümlədən, şair-publisist Əvəz Mahmud Lələdağ çıxış edərək, şəhidlərə aid yazdığı şeiri səsləndirdi. Ağsaqqallarla yanaşı mərasimdə şəhid ailələrinin üzvləri, Qarabağ qaziləri söz alaraq belə bir tədbiri təşkil edənlərə minnətdarlıq hisslərini çatdırıblar.
Xatırladaq ki, Qarakilsə şəhidlərinin xatirəsi üçün təşkil olunan tədbirə, şəhid ailələri və qazilərlə yanaşı, Qərbi Azərbaycan İcmasının Sumqayıt şəhər nümayəndəliyinin rəhbəri Ramiz İsmayılov, Azərbaycan Milli QHT forumunun prezidenti Rauf Zeyni və bir sıra media nümayəndələri qonaq qismində qatılmışlar.

14-11-2023, 12:35 603