Qərbi Azərbaycan İcması (QAİ) Çəmbərək (Krasnoselski) rayonu Bəriyabad kənd icmasının Sumqayıt şəhərində  növbəti iclası keçrilib. 
Kənd icmasından Sumqayit.tv-yə verilən məlumata görə, toplantı Sumqayıt şəhər 21 saylı tam orta məktəbin akt zalında olub. Tədbir vətən uğrunda canlarını fəda edən şəhidlərimizin əziz xatirəsini bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.
Yığıncağı Qərbi Azərbaycan İcmasının bölgə üzrə koordinatoru İman Məmmədov açaraq, Bəriyabad kənd icmasının sədri Azər İsgəndərovu toplantı üzvlərinə təqdim edib, ona və həmkəndlilərinə uğurlar arzuladı. 
Kənd icmasının sədri A.İsgəndərov bildirib ki, Qərbi Azərbaycan İcmasının yaranması zərurətdən doğan məsələdir. Ona görə də biz -  Qərbi azərbaycanlılar daim Azərbaycan dövlətinin və siyasi rəhbərliyin yanında durmalıyıq. “Əgər biz Qərbi Azərbaycan amalı uğrunda birləşib mübarizə üsullarımızı inkişaf etdirə biləriksə, o zaman tezliklə ata-baba yurdlarımızı görmək hamımıza nəsib olar, - deyə Bəriyabad kənd icmasının sədri fikirlərini tamamlayıb. 
Çıxış edən Qərbi Azərbaycan İcması Sumqayıt nümayəndəliyinin sədri Ramiz İsmayılov da A.İsgəndərova və Bəriyabad kənd sakinlərinə gedilən müqəddəs yolda nailiyyətlər arzulayıb. O əlavə edib ki, aparılan mübarizənin nə qədər əhəmiyyətli və şərəfli olduğunu hər kəs dərk edib, dövlətimizin bizim qarşımızda qoyduğu missiyanı yerinə yetirmək üçün əlindən gələni etməlidir. “Bunun üçün dövlət başçımız cənab İlham Əliyev bizlərə hər bir şəraiti yaradıb. Bizə sadəcə işləmək və bu etimadı doğrultmaq qalır”.
 Eyni zamanda R.İsmayılov  Bəriyabad kənd icmasının Sumqayıtda yaşayan sakinlərini QAİ Sumqayıt şəhər nümayəndəliyi ilə əlaqəli şəkildə işləməyə dəvət edib.
Daha sonra Bəriyabad kənd icmasının Ziyalılar, Ağsaqqallar, Qadınlar və Gənclər Şurası yaradıldı. 
Kənd sakinləri çıxış edərək yekdilliklə bu işə töhfə verəcəklərini, doğma yurdlarına qayıtmaq üçün əllərindən gələn nə varsa əsirgəməyəcəklərini söz verdilər.