Qərbi Azərbaycan İcması (QAİ) Sumqayıt Nümayəndəliyinin ofisində Karvansaray (İcevan) rayonu Haqqıxlı kənd icmasını Gənclər Birliyinin iclas keçirib.  
Sumqayit.tv xəbər verir ki, yığıncaq Azərbaycanın bütövlüyü uğurunda canlarını fəda edən şəhidlərimizin əziz xatirəsini bir dəqiqəlik sükutla yad edilərək başlayıb.
Sonra Sumqayıt nümayəndəliyinin rəhbəri Ramiz İsmayılov çıxış edərək gəncləri öz adından və Qərbi Azərbaycan İcması İdarə Heyyətinin sədri, millət vəkili Əziz Ələkbərlinin  adından salamlayaraq onlara fəaliyyətlərində uğurlar arzulayıb. Yığıncaq iştirakçılarına İcamanın nizamnaməsi və mərəmnaməsi barədə qısa məlumat verən R.İsmayılov əlavə edib ki, qarşımıza qoyulan məqsədə çatmaq üçün əsas yük məhz gənclərin üzərinə düşür.

Haqqıxlı kənd icmasının sədri İbad Mehdiyev ictimai-mədəni birliyə nail olmaq üçün atılmalı olan addımlar haqqında ətraflı məlumat verib. Eyni zamanda İ.Mehdiyev bu işdə ağsaqqallar olaraq gənclərə dəstək verəcəklərinin əminliyini vurğulayıb.

Daha sonra Haqqıxlı kənd icmasının Gənclər Birliyinin sədri Ayaz İbrahimli çıxış edərək belə bir iclasın keçirilməsi üçün yaradılan şəraitə görə, hər kəsə minnətdarlığını bildirib. O əlavə edib ki, ilk növbədə əsas məqsədimiz Haqqıxlı kəndindən olan gənclərin bir-birilərini tanımasına nail olmaqdır. Daha sonra fəaliyyət istiqamətinə uyğun olaraq dövlət başçısının irəli sürdüyü konsepsiyanın reallaşması istiqamətində iş görmək və düşmənin yalan iddialarını ifşa edərək onların çirkin niyyətlərini puça çıxarmaq olmalıdır- deyən A.İbrahimli növbəti görüşün anonsunu verib. 
Öz növbəsində gənclər tarixi ata-baba yurdu olan Qərbi Azərbaycana qayıtmaq üçün var gücləri ilə çalışacaqlarına söz veriblər.