“2006-cı ildə yaradılan və hazırda 9 üzvü olan BRICS 2009-cu ildən bəri hər il rəsmi sammitlərdə toplaşan və çoxtərəfli siyasətləri əlaqələndirən vahid geosiyasi bloka çevrilib.
Yarandığı gündən beynəlxalq münasibətlər sisteminin demokratikləşməsinə xidmət edən, dünya əhalisinin təxminən yarısını və qlobal iqtisadiyyatın 1/4-dən çoxunu təşkil edən nəhəng iqtisadi güc mərkəzinə çevrilən BRICS qlobal idarəetmənin təkmilləşdirilməsinə və daha ədalətli beynəlxalq nizamın inkişafına töhfə verməkdədir.
Rusiya Fedarsiyasının Kazan şəhərində keçirilən builki BRICS Sammitinə 36 ölkədən və 6 beynəlxalq təşkilatdan nümayəndə heyətləri, o cümlədən 22 dövlət başçısı və BMT-nin Baş katibi Antonio Quterreşin qatılması bu təşkilatın artıq kifayət qədər nüfuzlu beynəlxalq təşkilata çevrildiyini və BRICS-ə üzv olan ölkələrin beynəlxalq hüquq, ərazi bütövlüyü, suverenlik və bir-birinin daxili işlərinə müdaxilə etməmə prinsiplərinə sadiq qaldığını, dövlətlər arasında qarşılıqlı faydalı münasibətləri dəstəkləməklə, siyasi gündəliyin yalnız bir qrup ölkə tərəfindən inhisarlaşdırılmasının qarşısını almaq işinə ciddi töhfələr verdiyini göstərir.
Azərbaycan Respublikasının Prezidenti cənab İlham Əliyevin oktyabrın 24-də XVI BRICS Sammitinin “Outreach”/“BRICS+” formatının ilk plenar iclasında çıxış edərək Azəbaycanın bu təşkilatda yerinə və fəaliyyətinə aydınlıq gətirməklə, həm də ölkəmizin qəti mövqeyini bir daha nümayiş etdirmişdir.”

Bu sözləri aia.az-a müsahibəsində millət vəkili, Qərbi Azərbaycan İcması İdarə Heyətinin sədri Əziz Ələkbərli söyləmişdir.

Millət vəkili qeyd etmişdir ki, “ 2020-2023-cü illərdə Qoşulmama Hərəkatına uğurlu sədrlik edən və bu sahədə kifayət qədər təcrübə qazanan Azərbaycan öz fəaliyyəti ilə göstərdi ki, beynəlxalq münasibətlərdə çoxtərəflilik prinsipinin fəal tərəfdarıdır və bu məsələdə ardıcıl mövqeyi ilə fərqlənir. Eyni zamanda bu müddətdə özünün institusional inkişafında böyük addım atan Qoşulmama Hərəkatı beynəlxalq münasibətlər sistemində öz yerini xeyli möhkəmləndirib. Hərəkata uğurlu sədrlik təcrübəsi ölkəmizə Asiyada Qarşılıqlı Fəaliyyət və Etimad Tədbirləri üzrə Müşavirənin hazırkı sədri qismində kifayət qədər kömək edir.
Ölkəmizin başçısı xüsusi vurğulayıb ki, öz coğrafi mövqeyindən istifadə edən və müasir infrastruktur yaradan Azərbaycan Avrasiyanın mühüm nəqliyyat və logistika mərkəzlərindən birinə çevrilib. Azərbaycanın ərazisindən keçən “Şərq-Qərb” və “Şimal-Cənub” nəqliyyat dəhlizlərinin Azərbaycan ərazisində olan bütün seqmentləri uğurla fəaliyyət göstərir.”
Əziz Ələkbərli bildirib ki, “cənab Prezident bir daha ölkəmizin prinsipial mövqeyini ifadə edərək qeyd etmişdir ki, artıq Qlobal Cənub və Qlobal Şimal arasında önəmli mövqe tutan Azərbaycan iqlim üzrə əməkdaşlığa töhfə verir və istər iqlim dəyişikliyi ilə bağlı məsələlərdə, istərsə də qlobal təhlükəsizlik, beynəlxalq hüququn aliliyi, bir-birinin işlərinə qarışmamaq, qarşılıqlı hörmət məsələlərində qarşılıqlı anlaşmaya nail olunmasına səy göstərəcək. Ölkəmizin belə bir prinsipial mövqeni ardıcıl olaraq inkişaf etdirməsi yeni tərəfdaşlarımızın sayını da artırmaqdadır. Məhz növbəti ayda təqribən 200 ölkənin COP29-un Azərbaycanda keçirilməsinə dair yekdil qərarı Azərbaycan dövlətinin, onun müdrik rəhbəri cənab İlham Əliyevin həyata keçirdiyi siyasətə hörmətin və dəstəyin parlaq sübutudur.”
Müsahibimiz sonda qeyd edib ki, “Sammit əsnasında Ermənistanın Baş naziri Paşinyanla sülh gündəliyini müzakirə edən ölkə başçısı bir daha ölkəmizin sülhə sadiqliyini nümayiş etdirmişdir. Qeyd edilənlər göstərir ki, cənab İlham Əliyev öz qətiyyətli və ardıcıl mövqeyi ilə siyasətə yeni çalarlar gətirməklə yanaşı, ölkəmizin mövqeyinin beynəlxalq müstəvidə daha da möhkəmlənməsinə əməli töhfələrini verməkdədir.”