TƏBİB-in tabeliyindəki Sumqayıt Tibb Mərkəzinin (STM) direktoru Səkinə Sadıxova tabeli tibb müəssisələrində kollektivlə görüşləri davam etdirir. 
Sumqayit.tv xəbər verir ki, növbəti belə görüş Uşaq Xəstəxanasında keçirilib. Direktor müavini Arzu Bəndəliyevanın, müvafiq şöbə və bölmə rəhbərlərinin də qatıldığı görüşdə xəstəxananın baş həkim əvəzi Esmira Hüseynova rəhbərlik etdiyi tibbi müəssisəsinin sutkalıq fəaliyyəti haqqında məlumat verib. Qeyd olunub ki, xəstəxana Sumqayıtda 110 mindən yuxarı uşaq əhaliyə xidmət göstərir, müəssisənin təcili tibbi yardım şöbəsi müasir tələblərə uyğun olaraq yenidən qurulub. Digər şöbələrdə də bu istiqamətdə işlər davam etdirilir. 
Görüşdə müvafiq şöbə rəhbərlərinin gündəlik hesabatları, tibbi personalın avadanlıq, cihaz, dərman, tibbi sərfiyyat üzrə təchizat və təminat kimi məsələlərlə bağlı müraciətləri dinlənilib. 

STM-in direktoru Səkinə Sadıxova çıxış edərək tibbi xidmətin keyfiyyətinin artırılması istiqamətində mərkəz tərəfindən görülən işlərdən danışıb, tibb müəssisələrinin yeni müasir tibbi avadanlıqlarla təchiz edilməsi ilə bağlı TƏBİB rəhbərliyi tərəfindən həyata keçirilən addımları kollektivin diqqətinə çatdırıb. 
Direktor kadr potensialının gücləndirilməsinin, tibb personalının peşəkarlığının artırılmasının vacibliyini vurğulayıb. 
S. Sadıxova çıxışında  pasiyent məmnunluğunun ən vacib şərtlərdən biri olduğunu qeyd edib və qaldırılan məsələlərin həlli istiqamətində aidiyyəti şöbə rəhbərlərinə zəruri tapşırıqlar verib. 
Sonda tibbi personalı maraqlandıran suallar cavablandırılıb.